اردو انٹرنیشنل (مانیٹرنگ ڈیسک) ڈان نیوز نے اپنی خبر میں رپورٹ کیا ہے کہ چیف آف ڈیفنس فورسز اور چیف آف آرمی اسٹاف فیلڈ مارشل عاصم منیر نے کہا ہے کہ مسلح افواج بھارتی سرپرستی میں سرگرم دہشت گرد تنظیموں کے خلاف کارروائیاں پوری شدت سے جاری رکھیں گی اور دہشت گرد جہاں بھی موجود ہوں گے، انہیں سخت جواب دیا جائے گا۔
پاک فوج کے شعبہ تعلقات عامہ آئی ایس پی آر کے مطابق فیلڈ مارشل عاصم منیر نے جمعے کو پشاور کور ہیڈکوارٹرز کا دورہ کیا، جہاں انہیں خیبر پختونخوا کی سکیورٹی صورتحال، جاری انسداد دہشت گردی آپریشنز، سرحدی انتظامات اور صوبے میں تعینات فوجی دستوں کی آپریشنل تیاریوں پر بریفنگ دی گئی۔
کور ہیڈکوارٹرز پہنچنے پر پشاور کور کمانڈر نے ان کا استقبال کیا۔ دورے کے دوران فیلڈ مارشل نے مسلح افواج کے اہلکاروں کے بلند حوصلے اور پیشہ ورانہ صلاحیتوں کو سراہا۔
آئی ایس پی آر کے بیان کے مطابق فیلڈ مارشل نے ہدایت کی کہ سکیورٹی خطرات کا مؤثر مقابلہ کرنے کے لیے مسلسل چوکسی اور آپریشنل تیاری کے اعلیٰ ترین معیار برقرار رکھے جائیں۔ انہوں نے واضح کیا کہ دہشت گرد تنظیموں کے خلاف مہم پوری قوت کے ساتھ جاری رہے گی اور انہیں جہاں بھی پایا گیا، سخت کارروائی کی جائے گی۔
فیلڈ مارشل نے دہشت گردی کے خلاف جنگ میں جانیں قربان کرنے والے سکیورٹی اہلکاروں کو خراج عقیدت بھی پیش کیا۔ ان کا کہنا تھا کہ عوام کی حمایت سے پاکستان دہشت گردوں اور ان کے انتہا پسندانہ نظریے کو مکمل شکست دینے میں کامیاب ہوگا۔
یہ دورہ ایسے وقت میں ہوا ہے جب ایک روز قبل جنرل عاصم منیر نے گورنر ہاؤس میں خیبر پختونخوا کی ایپکس کمیٹی کے اجلاس میں شرکت کی تھی۔ وزیراعظم شہباز شریف کی زیر صدارت ہونے والے اجلاس میں صوبے کی مجموعی سکیورٹی صورتحال کا جائزہ لیا گیا تھا۔
وزیراعظم نے اجلاس میں کہا تھا کہ وفاقی حکومت، جو گورنر راج کے تحت خیبر پختونخوا کے انتظامی امور چلا رہی ہے، صوبے میں ترقی کی بحالی کے لیے ہر ممکن کوشش کرے گی۔
