اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق امریکی صدر ڈونلڈ ٹرمپ نے ایران کے خلاف اپنے سخت مؤقف میں مزید شدت لاتے ہوئے کہا ہے کہ امریکی عوام کو ایران کو جوہری ہتھیار حاصل کرنے سے روکنے کی قیمت کے طور پر پٹرول کے لیے کچھ زیادہ رقم ادا کرنا پڑسکتی ہے، جبکہ انہوں نے عندیہ دیا ہے کہ امریکا جلد آبنائے ہرمز کو اپنا علاقہ قرار دے گا۔
گارڈن سٹی میں خطاب کرتے ہوئے ٹرمپ نے کہا کہ اگر امریکی شہریوں کو پٹرول کے لیے تھوڑی سی زیادہ قیمت ادا کرنا پڑے تو انہیں یاد رکھنا چاہیے کہ یہ ایران کو جوہری ہتھیار حاصل کرنے سے روکنے کی قیمت ہے۔
ٹرمپ نے ایران کو ایک انتہائی خطرناک ملک قرار دیتے ہوئے کہا کہ امریکا جو کچھ کررہا ہے وہ صرف اپنے لیے نہیں بلکہ پوری دنیا کے لیے ایک اہم خدمت ہے۔ انہوں نے مزید کہا کہ وہ ایران پر حملہ کرنے کے لیے کبھی معذرت نہیں کریں گے۔
امریکی صدر نے کہا، ایران کو شکست دینے کے بعد، بہت جلد میں آبنائے ہرمز کو امریکا کا علاقہ قرار دوں گا۔
تاہم یہ واضح نہیں کہ ٹرمپ کا بیان کسی نئی پالیسی کا اشارہ ہے یا محض سیاسی بیان، کیونکہ اس حوالے سے واشنگٹن کی جانب سے کوئی باضابطہ پالیسی اعلان سامنے نہیں آیا۔
ڈیموکریٹک رہنما پہلے ہی ایران جنگ کے معاشی اثرات کو نومبر کے وسط مدتی انتخابات میں اہم سیاسی مسئلہ بنانے کی کوشش کررہے ہیں۔
