اردو انٹرنیشنل (مانیٹرنگ ڈیسک) ایکسپریس ٹریبیون نے اپنی خبر میں رپورٹ کیا ہے کہ بنگلہ دیش کے وزیراعظم طارق رحمان نے بھارت کے ساتھ دوطرفہ تعلقات کو مزید بہتر بنانے کے لیے سازگار ماحول پیدا کرنے کی ضرورت پر زور دیا ہے، تاہم ڈھاکا نے بھارت سے سابق وزیراعظم شیخ حسینہ واجد کی حوالگی کا مطالبہ بھی برقرار رکھا ہے۔
وزیراعظم طارق رحمان نے یہ بات بنگلہ دیش میں بھارت کے نئے ہائی کمشنر دنیش تریویدی سے اپنی پہلی ملاقات کے دوران کہی۔ وزیراعظم آفس کے مطابق طارق رحمان نے دونوں ممالک کے درمیان تعلقات کو مزید آگے بڑھانے کے لیے سازگار ماحول پیدا کرنے پر زور دیا۔
ملاقات کے دوران بنگلہ دیش نے بھارت سے شیخ حسینہ واجد کی حوالگی تیز کرنے کا مطالبہ بھی کیا۔ حسینہ واجد اگست 2024 میں اپنی حکومت کے خاتمے کے بعد بھارت منتقل ہوگئی تھیں اور اس وقت سے وہ وہیں مقیم ہیں۔
بنگلہ دیش میں حسینہ واجد کو مختلف قانونی مقدمات کا سامنا ہے اور نومبر میں انہیں سزائے موت سنائی جا چکی ہے۔ ان کی بھارت میں موجودگی دونوں ممالک کے درمیان تعلقات میں ایک حساس اور اہم معاملہ بنی ہوئی ہے۔
حسینہ واجد نے حال ہی میں بھارت میں رہتے ہوئے پہلی مرتبہ میڈیا سے نمایاں گفتگو کی۔ ایک آن لائن آڈیو کانفرنس میں انہوں نے کہا تھا کہ وہ دسمبر میں بنگلہ دیش واپس جائیں گی۔ ان کے اس بیان کے بعد ان کی موجودگی اور سیاسی سرگرمیوں کا معاملہ ایک مرتبہ پھر بنگلہ دیش اور بھارت کے درمیان توجہ کا مرکز بن گیا۔
