اسٹیٹ بینک نے نئے کرنسی نوٹ کے ڈیزائن کے لیے آرٹ مقابلے کا اعلان کردیا
اردو انٹرنیشنل (مانیٹرنگ ڈیسک) اسٹیٹ بینک آف پاکستان نے نئے کرنسی ڈیزائن کے لیے آرٹ مقابلے کا اعلان کیا ہے۔ ان کا کہنا ہے کہ مقامی آرٹسٹ اور طالب علم اپنے ڈیزائن 11 مارچ 2024 تک ارسال کریں۔
نئے کرنسی نوٹ کے ڈیزائن کے لیے آرٹ مقابلے کا اعلان اسٹیٹ بینک آف پاکستان نے سماجی پلیٹ فارم ایکس کے ذریعے کیا ہے۔
اسٹیٹ بینک آف پاکستان کی جانب سے جاری اعلامیے میں کہا گیا کہ تمام مالیت کے نئے کرنسی نوٹ ڈیزائن اور اجراء پر کام کا آغاز کردیا ہے۔
اس آرٹ مقابلے میں صرف آرٹسٹ، ڈیزائنرز اور آرٹ کے طلباء حصہ لینے کے اہل ہیں، مقابلے میں آرٹسٹ مختلف تھیمز پر ڈیزائن تیار کرسکتے ہیں۔
اسٹیٹ بینک آف پاکستان کے مطابق نئے نوٹوں کے اجراء میں عموما 2 سے 3 سال درکار ہوتے ہیں، اسٹیٹ بینک 2 سال میں نئے کرنسی نوٹ جاری کرنے کا ارادہ رکھتا ہے۔
اعلامیے میں کہا گیا ہے کہ بینک دولت کرنسی ڈیزائن کے لیے آرٹ مقابلے سے نئے کرنسی سریز کے ڈیزائن جمع کرے گا۔ جس کے لیے مقامی آرٹسٹ، ڈیزائنرز اور طالب علم اپنے ڈیزائن 11 مارچ 2024 تک بھیجیں گے۔
اعلامیے کے مطابق سات مختلف مالیت کے ہرنوٹ کے لیے تین ڈیزائن منتخب کئے جائیں گے، مقابلے میں منتخب ڈیزائن کو پروفیشنل بینک نوٹ ڈیزائنرز کی مدد سے حتمی شکل دی جائے گی۔
حتمی شکل دی گئی سریز کو حکومت پاکستان کی منظوری کے لیے بھیجا جائے گا۔ نئی کرنسی سیریز کے اجراء کے بعد بھی موجودہ سیریز سرکولیشن میں رہے گی۔ نئی کرنسی سیریز کی وافر سپلائی کے بعد موجودہ سیریز مرحلہ وار ختم کی جائے گی۔
