اردو انٹرنیشنل اسپورٹس ویب ڈیسک تفصیلات کے مطابق وزارت پبلک سیکیورٹی کے ژانگ شیاؤپینگ نے ایک پریس کانفرنس میں بتایا کہ چینی فٹ بال ایسوسی ایشن نے میچ فکسنگ اور جوئے کی دو سال کی تحقیقات کے بعد 38 فٹ بال کھلاڑیوں اور پانچ کلب آفیشلز پر تاحیات پابندی عائد کر دی ہے۔ تحقیقات سے یہ بات سامنے آئی کہ 120 میچوں میں ہیرا پھیری کی گئی اور اس میں 41 فٹ بال کلب شامل تھے ۔ تاہم رپورٹ میں یہ نہیں بتایا گیا کہ آیا تمام میچ چین میں ہوئے۔
پابندی عائد کرنے والوں میں تین سابق چینی بین الاقوامی کھلاڑی اور ایک جنوبی کوریا کا کھلاڑی شامل ہے۔ جنوبی کوریا کے ایک کھلاڑی سون جون ہو کو چین میں 10 ماہ تک حراست میں رکھنے کے بعد مارچ میں رہا کیا گیا تھا۔
تاحیات پابندی کے علاوہ، 44 افراد رشوت خوری، جوا کھیلنے اور غیر قانونی کیسینو چلانے کے مجرمانہ الزامات کا سامنا کر رہے ہیں۔ ان میں سے 43 پر فٹ بال سے متعلق سرگرمیوں پر تاحیات پابندی عائد کی گئی ہے، جبکہ 17 پر پانچ سال کی پابندی عائد کی گئی ہے۔
قومی ٹیم کی حالیہ خراب کارکردگی کے بعد بدعنوانی کے خلاف یہ کریک ڈاؤن ملک میں فٹ بال جیسے کھیل کی شفافیت کو یقینی بنانے کے لیے چین کی کوششوں کا حصہ ہے۔ یہ اعلان ورلڈ کپ کوالیفائر میچ سے پہلے ہوا جہاں چین سعودی عرب کے خلاف کھیلے گا۔