اردو انٹرنیشنل (مانیٹرنگ ڈیسک) ایکسپریس ٹریبیون کی خبر کے مطابق صدر مملکت آصف علی زرداری نے اپنے سرکاری دورۂ کرغزستان کے دوران تاریخی عطا بیت میموریل کمپلیکس کا دورہ کیا، جہاں انہوں نے کرغزستان کے قومی ہیروز، آزادی کی جدوجہد میں جان قربان کرنے والوں اور ملک کی تاریخی شخصیات کو خراجِ عقیدت پیش کیا۔
ایوانِ صدر کے میڈیا ونگ کے مطابق صدر زرداری نے چونگ تاش میں واقع یادگار کے مرکزی مقام پر پھولوں کی چادر چڑھائی اور مختلف ادوار میں وطن کے لیے جان قربان کرنے والے کرغز شہریوں کی خدمات کو سراہا۔ انہوں نے اس موقع پر کرغز عوام کی آزادی، خودمختاری اور قومی تشخص کے لیے دی جانے والی قربانیوں کو خراج تحسین پیش کیا۔
صدر مملکت نے بعد ازاں عطا بیت میموریل میوزیم کا بھی دورہ کیا، جہاں انہیں کرغزستان کی آزادی، قومی تاریخ اور ثقافتی ورثے سے متعلق تاریخی نوادرات اور دستاویزی ریکارڈ کے بارے میں بریفنگ دی گئی۔ انہوں نے عالمی شہرت یافتہ کرغز ادیب چنگیز آیتماتوف کی یادگار پر بھی حاضری دی، جو اسی یادگار میں سپرد خاک ہیں اور جنہیں وسطی ایشیا کی نمایاں ادبی شخصیات میں شمار کیا جاتا ہے۔
دورے کے دوران صدر آصف علی زرداری نے کرغز پارلیمنٹ جوگورکو کینیش کے اسپیکر مارلین ماماتالییف عبدالرحمانووچ سے بھی ملاقات کی۔ ملاقات میں دونوں رہنماؤں نے پاکستان اور کرغزستان کے درمیان موجود دیرینہ سیاسی تعلقات کو تجارت، سرمایہ کاری، پارلیمانی روابط، علاقائی روابط اور اقتصادی تعاون میں تبدیل کرنے کے امکانات پر تفصیلی تبادلہ خیال کیا۔
فریقین نے اس بات پر اتفاق کیا کہ دونوں ممالک کے درمیان پارلیمانی سفارت کاری، کاروباری روابط، عوامی سطح پر روابط اور مختلف شعبوں میں تعاون کو مزید وسعت دی جائے گی تاکہ دوطرفہ تعلقات کو نئی جہت دی جا سکے۔
