ایشین ہاکی چیمپئینز ٹرافی میں برانز میڈل جیتنے والی قومی ہاکی ٹیم تاحال ڈیلی الاونس سے محروم

اردو انٹرنیشنل اسپورٹس ویب ڈیسک تفصیلات کے مطابق چین میں کھیلی جانے والی ایشین ہاکی چیمپئینز ٹرافی میں برانز میڈل جیتنے والی پاکستان ہاکی ٹیم تاحال ڈیلی الاونس سے محروم ہے، کھلاڑیوں کو تاحال کیمپ کا ڈومیسٹک الاؤنس اور دورہ چین کا انٹر نیشنل ڈیلی الاؤنس جاری نہیں کیا گیا۔

ذرائع کے مطابق ایشین ہاکی چیمپئینز ٹرافی کی برانز میڈلسٹ ٹیم ڈیلی الاؤنس سے محروم ہے، کھلاڑیوں کو نہ تو کیمپ کے دوران گزارے گئے 25 روز کا ڈیلی الاونس ملا ہے اور نہ ہی چین میں 25 روز کا انٹر نیشنل ڈیلی الاونس مل سکا ہے ۔ کھلاڑیوں کو ڈومیسٹک ڈیلی الاؤنس 3 ہزار روپے جبکہ انٹر نیشنل ڈیلی الاؤنس 35 ہزار روپے ملتا ہے ۔

پاکستان ہاکی ٹیم چین کے دورے پر 24 اگست کو روانہ ہو ئی اور چیمپئیز ٹرافی سے قبل وہاں پریکٹس میچز کھیلے لیکن کھلاڑیوں کو فیڈریشن ایشین چیمپئینز ٹرافی سے ایک روز پہلے سے ڈیلی الاؤنس پر زور دینے کا کہہ رہی ہے ۔ کھلاڑیوں کا فیڈریشن سے مکمل 25 روز کے ڈیلی الاؤنس کی ادائیگی کا مطالبہ ہے ۔

کھلاڑیوں نے فیڈریشن سے ڈیلی الاؤنس کے لیے رابطہ کیا تو انہیں جواب دیا گیا کہ پاکستان اسپورٹس بورڈ (پی ایس بی) سے ملنے والے فنڈز سے ٹکٹوں کی ادائیگی کی ، ڈیلی الاؤنس جلد دیں گے۔

ایک کھلاڑی کا کہنا ہے کہ موجودہ حالات میں گزر بسر مشکل ہے ، ان حالات میں ڈیلی الاؤنس نہ ملنے سے حالات مزید خراب ہو رہے ہیں ، حکومت سے اپیل ہے کہ ڈیلی الاؤنس ہمارا حق ہے وہ تو دلایا جائے۔