اردو انٹرنیشنل (اسپورٹس ڈیسک) تفصیلات کے مطابق پاکستان کے فاسٹ باؤلر شاہین آفریدی نے گزشتہ دو ایڈیشنز میں ناکام رہنے کے بعد آئندہ آئی سی سی ٹی ٹوئنٹی ورلڈ کپ 2024 جیتنے کے لیے اپنے عزم کا اظہار کیا ہے۔
آفریدی پاکستان کے اس اسکواڈ کا حصہ تھے جو بالترتیب 2021 اور 2022 ورلڈ کپ کے سیمی فائنل اور فائنل تک پہنچے تھے۔
پی سی بی پوڈ کاسٹ پر ایک حالیہ بات چیت کے دوران 24 سالہ تیز گیند باز نے ٹیم کی حرکات کے بارے میں بھی کھل کر بات کی اور ٹیم کے اندر کسی قسم کی بے قاعدگی یا اختلافات کی تردیدکر دی۔
آفریدی نے کہا کہ بعض اوقات، چھوٹے چھوٹے اختلافات ہر خاندان میں ہوتے ہیں یہاں تک کہ بھائیوں کے درمیان بھی لیکن ہماری ٹیم میں ایسا کچھ نہیں ہے۔
انہوں نے اس بات پر بھی زور دیا کہ پاکستانی ٹیم ایک اہم موڑ پر ہے جس میں میگا ایونٹ قریب آرہا ہے اور کھلاڑی ٹیم کے لیے اپنی بہترین کارکردگی کا مظاہرہ کرنے پر مرکوز ہیں۔
انہوں نے مزید کہا کہ ہمارا مقصد اتحاد کے ساتھ کھیلنا ہے اور یہ بحث یا جھگڑے کا وقت نہیں ہے یہ وقت ہے کہ سب ایک صفحے پر ہوں .
اپنی فارم اور فٹنس کے بارے میں بات کرتے ہوئے اسٹار پیسر نے کہا کہ وہ فٹ ہیں اور پاکستان کے لیے ٹرافی اٹھانے کے لیے پرعزم ہیں۔
موڈ بھی اچھا ہے اور فٹنس بھی اچھی ہے شاہین آفریدی نے ریمارکس دیئے کہ میں تیار ہوں اور پر امید ہوں کہ ہم ٹی ٹوئنٹی ورلڈ کپ جیتیں گے۔
پاکستانی ٹیم اس وقت انگلینڈ کے خلاف چار میچوں کی ٹی ٹوئنٹی سیریز کی تیاریوں میں مصروف ہے جو 22 مئی سے شروع ہوگی۔
پاکستان اسکواڈ
بابر اعظم، ابرار احمد، اعظم خان، فخر زمان، حارث رؤف، حسن علی، افتخار احمد، عماد وسیم، محمد عباس آفریدی، محمد عامر، محمد رضوان، عرفان خان، نسیم شاہ، صائم ایوب، سلمان آغا، شاداب خان، شاہین آفریدی، عثمان خان۔