اردو انٹرنیشنل (مانیٹرنگ ڈیسک) ایکسپریس ٹریبیون کی خبر کے مطابق ایران نے امریکا کے ساتھ جاری جنگ کے خاتمے کے لیے اپنی شرائط قطر کے ذریعے واشنگٹن تک پہنچانے کا دعویٰ کیا ہے۔
ایرانی وزارت خارجہ کے ترجمان اسماعیل بقائی کے مطابق نیویارک میں اقوام متحدہ کی جنرل اسمبلی کے اجلاس کے موقع پر قطری ثالث کے ذریعے امریکی فریق سے رابطہ کیا گیا۔
ایرانی سرکاری خبررساں ادارے ارنا کے مطابق تہران کی شرائط میں تمام محاذوں پر جنگ کا خاتمہ، امریکا کے مبینہ جارحانہ اقدامات روکنا، بحری ناکہ بندی ختم کرنا، اقتصادی جنگ کا خاتمہ اور ایرانی اثاثوں کی واپسی شامل ہے۔
یہ پیش رفت ایسے وقت ہوئی ہے جب اقوام متحدہ کی جنرل اسمبلی کے اجلاس کے دوران ایران اور امریکا کے درمیان سفارتی رابطوں کی کوششیں جاری ہیں۔
امریکی صدر ڈونلڈ ٹرمپ نے بھی کہا ہے کہ معاہدہ نہ ہونے کی صورت میں ایران کے خلاف انتہائی سخت کارروائی کی جاسکتی ہے، تاہم ان کا کہنا تھا کہ جنگ ختم کرنے کے لیے معاہدہ جلد بھی ممکن ہوسکتا ہے۔
اسی دوران ایرانی ریاستی میڈیا کے مطابق جنوبی ایران کے قشم جزیرے کے قریب سمندر کی سمت سے دھماکے کی آواز سنی گئی۔
ارنا نے کہا کہ جزیرے پر کوئی راکٹ یا میزائل نہیں گرا، جبکہ مقامی حکام نے دھماکے کی وجہ کے بارے میں فوری طور پر باضابطہ وضاحت نہیں دی۔
