تہران میں عاصم منیر کی اہم ملاقاتیں ، ایران-امریکا کشیدگی کم کرنے کیلئے پاکستان متحرک

اردو انٹرنیشنل (مانیٹرنگ ڈیسک)ڈان نیوز کی خبر  کے مطابق  چیف آف ڈیفنس فورسز اور آرمی چیف فیلڈ مارشل سید عاصم منیر اعلیٰ سطحی وفد کے ہمراہ تہران پہنچ گئے، جہاں انہوں نے ایرانی وزیر خارجہ عباس عراقچی اور دیگر اعلیٰ حکام سے ملاقاتیں کیں۔ یہ دورہ ایران اور امریکا کے درمیان جاری کشیدگی کم کرنے کیلئے پاکستان کی سفارتی کوششوں کا حصہ قرار دیا جا رہا ہے۔

آئی ایس پی آر کے مطابق وفد میں وزیر داخلہ محسن نقوی بھی شامل ہیں اور اس دورے کا مقصد حالیہ مذاکراتی عمل کو آگے بڑھانا اور خطے میں استحکام کو یقینی بنانا ہے۔ ایرانی وزیر خارجہ نے پاکستان کی جانب سے اسلام آباد میں ہونے والے مذاکرات کی میزبانی کو سراہتے ہوئے اسے دوطرفہ تعلقات کی مضبوطی کی علامت قرار دیا اور امن کیلئے مشترکہ عزم کا اظہار کیا۔

یہ پیش رفت ایسے وقت میں سامنے آئی ہے جب اسلام آباد میں ہونے والے ایران-امریکا مذاکرات کسی حتمی نتیجے تک نہیں پہنچ سکے، تاہم دونوں ممالک کے درمیان پاکستان کے ذریعے رابطے بدستور جاری ہیں۔ ایرانی ترجمان اسماعیل بقائی کے مطابق پیغامات کا تبادلہ جاری ہے اور مذاکراتی عمل کو آگے بڑھانے کیلئے مزید پیش رفت متوقع ہے۔

ایرانی حکام نے ایک بار پھر واضح کیا ہے کہ یورینیم افزودگی کا حق ناقابلِ تنسیخ ہے، تاہم اس کی نوعیت اور سطح پر بات چیت ممکن ہے، جبکہ بعض امریکی مطالبات کو غیر حقیقت پسندانہ قرار دیا گیا ہے۔

ادھر امریکی صدر ڈونلڈ ٹرمپ نے بھی عندیہ دیا ہے کہ ایران کے ساتھ مذاکرات آئندہ دنوں میں دوبارہ شروع ہو سکتے ہیں اور اس ضمن میں پاکستان اہم کردار ادا کر سکتا ہے۔ انہوں نے پاکستانی قیادت کی کوششوں کو سراہتے ہوئے پیش رفت کی امید ظاہر کی۔