اسٹیٹ بینک نے پلاسٹک کے نوٹوں کے اجرا سے متعلق خبروں کی تردید کردی

اسٹیٹ بینک نے پلاسٹک کے نوٹوں کے اجرا سے متعلق خبروں کی تردید کردی

اردو انٹرنیشنل (مانیٹرنگ ڈیسک) اسٹیٹ بینک آف پاکستان نے پولیمر (پلاسٹک)کے بینک نوٹوں کی سیریز کے اجرا سے متعلق خبروں کی تردید کی ہے۔

اسٹیٹ بینک آف پاکستان (ایس بی پی) کی جانب سے ہفتہ کو جاری بیان میں کہا گیا ہے کہ پولیمر بینک نوٹوں کے اجرا کے بارے میں مختلف نیوز پورٹلز پر رپورٹس گردش کر رہی ہیں۔ بینک دولت پاکستان ان خبروں کو بے بنیاد اور غیر حقیقی قرار دیتے ہوئے سختی سے مسترد کرتا ہے۔

پی آر او کا کہنا تھا کہ بینک نوٹوں کے کاغذ سے پولیمر میں تبدیل کیے جانے کے بارے میں فی الحال کوئی منصوبہ یا تجویز زیر غور نہیں ہے۔

مزید کہا کہ اسٹیٹ بینک کپاس پر مبنی کاغذ استعمال کرتا ہے جو سیکیورٹی پیپرز لمیٹڈ کی طرف سے بنیادی طور پر مقامی خام مال کا استعمال کرتے ہوئے مقامی طور پر تیار کیا جاتا ہے۔

واضح رہے کہ گزشتہ روز مختلف میڈیا رپوٹس میں کہا گیا تھا کہ جعلی کرنسی کے بڑھتے ہوئے واقعات کے پیش نظر مرکزی بینک نے پلاسٹک کے نوٹ لانے کا منصوبہ بنایا ہے۔

یہ بھی رپورٹ کیا گیا تھا کہ اس حوالے سے عالمی مالیاتی ادارے (آئی ایم ایف) کے وفد کو بریفنگ دی جائے گی۔