The debt burden has increased further, with each citizen owing Rs. 333,000.
اردو انٹرنیشنل (مانیٹرنگ ڈیسک)ایکسپریس ٹریبیون نے اپنی رپورٹ میں بتایا ہے کہ وفاقی وزارتِ خزانہ کی جانب سے پارلیمنٹ میں پیش کی گئی مالیاتی پالیسی رپورٹ کے مطابق گزشتہ مالی سال کے دوران ہر پاکستانی شہری پر قرض کا بوجھ 13 فیصد اضافے کے بعد 3 لاکھ 33 ہزار روپے تک پہنچ گیا، جبکہ مجموعی عوامی قرض ملکی مجموعی پیداوار (جی ڈی پی) کے 70.7 فیصد تک بڑھ گیا۔
رپورٹ کے مطابق مالی سال 2023-24 میں فی کس قرض 2 لاکھ 94 ہزار 98 روپے تھا، جو مالی سال 2024-25 کے اختتام پر بڑھ کر 3 لاکھ 33 ہزار 41 روپے ہو گیا۔ یوں صرف ایک سال میں فی کس قرض میں تقریباً 39 ہزار روپے کا اضافہ ہوا۔
وزارتِ خزانہ کے مطابق جون 2024 میں مجموعی عوامی قرض 71.2 کھرب روپے تھا، جو جون 2025 تک بڑھ کر 80.5 کھرب روپے ہو گیا۔ رپورٹ میں کہا گیا ہے کہ قرض میں اضافے کی بڑی وجوہات زیادہ شرح سود پر قرض گیری اور روپے کی قدر میں کمی ہیں۔
مالیاتی پالیسی رپورٹ میں اعتراف کیا گیا ہے کہ گزشتہ مالی سال کے دوران عوامی قرض کی صورتحال ایک بڑا چیلنج بنی رہی، جبکہ بجٹ خسارہ قانونی حد سے تجاوز کر گیا۔ رپورٹ کے مطابق وفاقی بجٹ خسارہ 6.2 فیصد جی ڈی پی رہا، حالانکہ قانون کے تحت یہ حد 3.5 فیصد مقرر ہے، یوں بجٹ خسارہ تقریباً 3 کھرب روپے زیادہ رہا۔
رپورٹ میں بتایا گیا ہے کہ مالی سال کے دوران کل وفاقی اخراجات 18.9 کھرب روپے مقرر کیے گئے تھے، جن میں سے موجودہ اخراجات 17.2 کھرب روپے تھے۔ دفاعی اخراجات 2.2 کھرب روپے رہے، جبکہ سود کی ادائیگیوں کی مد میں 8.8 کھرب روپے خرچ کیے گئے۔
آمدن کے حوالے سے رپورٹ میں کہا گیا ہے کہ ٹیکس وصولیاں 11.7 کھرب روپے رہیں، جو مقررہ ہدف 13 کھرب روپے سے کم تھیں، جبکہ نان ٹیکس آمدن 5.1 کھرب روپے رہی، جو ہدف سے زیادہ ہے۔
وزارتِ خزانہ کے مطابق حکومت کی درمیانی مدت کی قرضہ مینجمنٹ حکمت عملی کا مقصد قرض کی ضروریات میں کمی، ادائیگی کی مدت میں توسیع اور مالی ذرائع میں تنوع پیدا کرنا ہے تاکہ مستقبل میں معیشت کو پائیدار بنیادوں پر استوار کیا جا سکے۔
