افریقہ میں بڑا آپریشن، امریکی اور نائجیرین فورسز نے داعش رہنما کو ہلاک کر دیا

اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق امریکی صدر ڈونلڈ ٹرمپ نے اعلان کیا ہے کہ امریکا اور نائجیریا کی مشترکہ کارروائی میں داعش کے عالمی نائب سربراہ ابو بلال المنوکی کو ہلاک کر دیا گیا ہے۔ امریکی صدر کے مطابق یہ آپریشن انتہائی خفیہ معلومات اور منظم حکمت عملی کے تحت انجام دیا گیا۔

صدر ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ امریکی فورسز اور نائجیریا کی مسلح افواج نے ایک پیچیدہ اور کامیاب مشن کے دوران داعش کے اہم ترین رہنما کو نشانہ بنایا۔ ان کے بقول ابو بلال المنوکی افریقہ میں روپوش تھا، تاہم امریکی انٹیلی جنس ادارے مسلسل اس کی سرگرمیوں پر نظر رکھے ہوئے تھے۔

امریکی صدر نے کارروائی کے مقام کی تفصیلات تو جاری نہیں کیں، تاہم انہوں نے اس آپریشن کو دہشتگردی کے خلاف بڑی کامیابی قرار دیا۔ ٹرمپ نے نائجیریا کی حکومت اور سکیورٹی اداروں کے تعاون کو بھی سراہا۔

امریکی حکام کے مطابق ابو بلال المنوکی نائجیریا کا شہری تھا اور اسے 2023 میں سابق بائیڈن انتظامیہ نے خصوصی عالمی دہشتگرد قرار دیا تھا۔ اس پر داعش کی عالمی سرگرمیوں میں اہم کردار ادا کرنے کا الزام تھا۔

یاد رہے کہ امریکا گزشتہ کئی برسوں سے مغربی افریقہ میں داعش اور القاعدہ سے منسلک شدت پسند گروپوں کے خلاف انٹیلی جنس اور عسکری تعاون فراہم کر رہا ہے۔ امریکی میڈیا رپورٹس کے مطابق واشنگٹن نے نائجیریا میں انسداد دہشتگردی آپریشنز کے لیے ڈرونز، انٹیلی جنس معاونت اور فوجی تربیت بھی فراہم کی ہوئی ہے۔

نائجیریا کی فوج پہلے ہی واضح کر چکی ہے کہ امریکی اہلکار براہِ راست جنگی کارروائیوں میں حصہ نہیں لیتے بلکہ تکنیکی اور انٹیلی جنس سپورٹ فراہم کرتے ہیں