ایران کے تازہ حملے، خلیج میں جنگ پھیل گئی؛ آبنائے ہرمز بند، دنیا میں تشویش

اردو انٹرنیشنل (مانیٹرنگ ڈیسک) ایکسپریس ٹریبیون کی خبر کے مطابق مشرقِ وسطیٰ میں جاری جنگ نے خطرناک رخ اختیار کر لیا ہے، جہاں ایران نے خلیجی ممالک پر اپنے حملے تیز کر دیے ہیں، جبکہ آبنائے ہرمز بدستور بند ہونے کے باعث عالمی سطح پر تشویش میں اضافہ ہو رہا ہے۔

رپورٹس کے مطابق ایران نے متحدہ عرب امارات کو نشانہ بنایا، جہاں فجیرہ کے آئل زون میں ڈرون حملہ کیا گیا جبکہ ابوظہبی میں میزائل کے ملبے کے گرنے سے ایک پاکستانی شہری جاں بحق ہوا۔ مزید برآں شاہ گیس فیلڈ میں ڈرون حملے کے بعد آگ بھڑک اٹھی، جس پر قابو پانے کی کوششیں جاری رہیں۔

ایران نے اسرائیل پر بھی میزائل حملے جاری رکھے ہوئے ہیں، جبکہ اسرائیلی فوج نے تہران اور بیروت میں نئی کارروائیاں تیز کر دی ہیں۔ بغداد میں امریکی سفارت خانے پر بھی راکٹوں اور ڈرونز سے حملہ کیا گیا، تاہم کوئی جانی نقصان کی اطلاع نہیں ملی ۔

امریکی صدر ڈونلڈ ٹرمپ نے خلیجی ممالک پر حملوں کو غیر متوقع قرار دیا

ادھر جرمنی، اسپین، اٹلی، جاپان اور آسٹریلیا سمیت کئی امریکی اتحادیوں نے آبنائے ہرمز میں فوجی تعاون سے انکار کر دیا ہے، جس سے امریکہ کو سفارتی سطح پر مشکلات کا سامنا ہے۔