امریکی بحریہ میں بڑا جھٹکا: سیکریٹری نیوی جان فیلن فوری عہدہ چھوڑ گئے

اردو انٹرنیشنل (مانیٹرنگ ڈیسک) بی بی سی کی خبر  کے مطابق  امریکی محکمہ دفاع نے اعلان کیا ہے کہ امریکی بحریہ کے سیکریٹری جان فیلن فوری طور پر اپنے عہدے سے الگ ہو گئے ہیں، جبکہ نیوی کے انڈر سیکریٹری ہنگ کاؤ کو قائم مقام ذمہ داریاں سونپ دی گئی ہیں۔

پینٹاگون کے ترجمان شان پارنیل کے مطابق یہ فیصلہ فوری طور پر مؤثر ہے، تاہم فیلن کی اچانک رخصتی کی باضابطہ وجہ نہیں بتائی گئی۔ وہ حالیہ مہینوں میں عہدہ چھوڑنے والے سینئر عسکری عہدیداروں میں شامل ہو گئے ہیں، جس سے امریکی دفاعی قیادت میں تبدیلیوں کا سلسلہ مزید تیز ہو گیا ہے۔

امریکی میڈیا رپورٹس کے مطابق جان فیلن اور وزیر دفاع پیٹ ہیگستھ کے درمیان بحری جہاز سازی اور صدر ڈونلڈ ٹرمپ کے گولڈن فلیٹ منصوبے پر اختلافات سامنے آئے تھے، جو ان کی رخصتی کی ممکنہ وجہ قرار دی جا رہی ہے، تاہم سرکاری سطح پر اس کی تصدیق نہیں کی گئی۔

پیٹ ہیگستھ اس سے قبل بھی کئی اعلیٰ فوجی افسران کو عہدوں سے ہٹا چکے ہیں، جن میں آرمی چیف آف اسٹاف رینڈی جارج سمیت دیگر سینئر افسران شامل ہیں۔ مبصرین کے مطابق پینٹاگون میں پالیسی سطح پر بڑی تبدیلیاں جاری ہیں۔

جان فیلن، جو ایک کاروباری شخصیت تھے اور فوجی پس منظر نہیں رکھتے تھے، مارچ 2025 میں اس عہدے پر فائز ہوئے تھے۔ ان کی ذمہ داریوں میں بحریہ کی پالیسی سازی، بھرتی، تربیت، بجٹ اور بحری اثاثوں کی دیکھ بھال شامل تھی۔

دوسری جانب قائم مقام سیکریٹری ہنگ کاؤ 25 سالہ بحری تجربہ رکھتے ہیں اور اس سے قبل انڈر سیکریٹری کے طور پر خدمات انجام دے رہے تھے۔

یہ پیش رفت ایک ایسے وقت میں سامنے آئی ہے جب امریکا ایران کے خلاف بحری ناکہ بندی جاری رکھے ہوئے ہے اور آبنائے ہرمز میں کشیدگی برقرار ہے، جس کے باعث عالمی سطح پر توانائی کی ترسیل بھی دباؤ کا شکار ہے۔