اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق یمن کی بین الاقوامی طور پر تسلیم شدہ حکومت نے دعویٰ کیا ہے کہ حوثی باغیوں نے جمعہ کو بحیرہ احمر کی بندرگاہ موخا پر 6 بیلسٹک میزائل داغے، جس کے نتیجے میں کم از کم 4 شہری جاں بحق ہوگئے۔
یمنی حکومت سے وابستہ مسلح افواج کے مطابق حملے میں شہری تنصیبات اور بندرگاہ کے قومی اثاثوں کو نشانہ بنایا گیا، جبکہ ابتدائی اطلاعات کے مطابق کئی ماہی گیری کی کشتیاں بھی آگ لگنے سے تباہ ہوگئیں۔
یہ حملہ ایسے وقت میں ہوا ہے جب ایران کے خلاف جاری امریکا اور اسرائیل کی جنگ کے باعث مشرق وسطیٰ میں کشیدگی پہلے ہی شدید ہے اور حوثی اس تنازع میں ایک اہم محاذ کے طور پر سامنے آئے ہیں۔
حوثیوں نے حملے کی تصدیق کرتے ہوئے مختلف مؤقف اختیار کیا۔ گروپ کا کہنا ہے کہ اس نے موخا میں سعودی حمایت یافتہ فورسز کی فوجی سرگرمیوں، ہتھیاروں اور جنگی کشتیوں کو نشانہ بنایا۔
حوثیوں کے مطابق حملے میں سعودی حمایت یافتہ فورسز اور ان کے لیے لڑنے والے "کرائے کے جنگجوؤں” کے فوجی ٹھکانوں اور سازوسامان کو بڑی تعداد میں بیلسٹک میزائلوں کے ذریعے نشانہ بنایا گیا، جس میں کشتیاں اور ہتھیار تباہ ہوئے۔
یمن میں تازہ حملے نے ملک میں دوبارہ بڑے پیمانے پر لڑائی شروع ہونے کے خدشات کو بڑھا دیا ہے۔ ایران، امریکا اور اسرائیل کے درمیان جاری جنگ کے دوران حوثیوں کی سرگرمیوں میں اضافے سے بحیرہ احمر اور اس کے اطراف کے تجارتی و بحری راستوں کو بھی خطرات لاحق ہوگئے ہیں۔
یمن پہلے ہی طویل عرصے سے جاری تنازع کے باعث شدید انسانی اور معاشی بحران کا شکار ہے، جبکہ تازہ علاقائی کشیدگی نے صورتحال مزید پیچیدہ کردی ہے۔
