Show of force in Gulf waters, Iran seizes tanker, US counterclaims
اردو انٹرنیشنل (مانیٹرنگ ڈیسک) الجزیرہ نیوز کی رپورٹ کے مطابقایران اور امریکا کے درمیان جاری کشیدگی ایک بار پھر شدت اختیار کر گئی ہے، جہاں ایران کی پاسدارانِ انقلاب نے خلیجِ عمان میں ایک آئل ٹینکر قبضے میں لینے کا دعویٰ کیا ہے، جبکہ امریکی فوج نے ایرانی بندرگاہوں کی جانب بڑھنے والے دو جہازوں کو ناکارہ بنانے کا اعلان کیا ہے۔
ایرانی خبر رساں ادارے فارس کے مطابق پاسدارانِ انقلاب نے خصوصی آپریشن کے دوران اوشن کوائے نامی آئل ٹینکر کو اپنی تحویل میں لیا۔ ایرانی حکام کا کہنا ہے کہ جہاز ایرانی تیل کی برآمدات میں رکاوٹ ڈالنے اور قومی مفادات کو نقصان پہنچانے کی کوشش کر رہا تھا۔
ایران کے سرکاری ٹی وی پریس ٹی وی نے ایک ویڈیو بھی جاری کی، جس میں ایرانی اہلکاروں کو جہاز پر چڑھتے ہوئے دکھایا گیا۔ میرین ٹریفک ڈیٹا کے مطابق یہ جہاز بارباڈوس میں رجسٹرڈ ہے۔
دوسری جانب امریکی سینٹرل کمانڈ نے دعویٰ کیا کہ امریکی فورسز نے خلیجِ عمان میں ایرانی پرچم بردار دو ٹینکرز کو اس وقت ناکارہ بنایا جب وہ ایرانی بندرگاہوں تک رسائی حاصل کرنے کی کوشش کر رہے تھے۔
امریکی سینٹرل کمانڈ کے سربراہ ایڈمرل بریڈلی کوپر کے مطابق امریکا خطے میں ایران آنے اور جانے والے بحری راستوں کی نگرانی اور ناکہ بندی کے نفاذ کیلئے کارروائیاں جاری رکھے ہوئے ہے۔
یہ پیش رفت ایسے وقت میں سامنے آئی ہے جب چند گھنٹے قبل آبنائے ہرمز میں ایران اور امریکا کے درمیان فائرنگ کا تبادلہ بھی ہوا، جس سے جنگ بندی کی کوششوں پر نئے خدشات پیدا ہوگئے ہیں۔
ایران کی اعلیٰ فوجی کمان نے الزام لگایا کہ امریکا نے جنگ بندی کی خلاف ورزی کرتے ہوئے ایک ایرانی آئل ٹینکر اور دوسرے جہاز کو نشانہ بنایا، جس کے نتیجے میں 10 ملاح زخمی جبکہ پانچ لاپتہ ہوگئے۔
ایرانی فوج کے مطابق امریکی طیاروں نے قشم جزیرے اور آبنائے ہرمز کے اطراف بعض شہری علاقوں پر بھی حملے کیے، جس کے جواب میں ایرانی فورسز نے امریکی بحری جہازوں کو نشانہ بنایا۔
