10-day ceasefire agreed between Israel and Lebanon, Trump's important announcement
اردو انٹرنیشنل (مانیٹرنگ ڈیسک)ڈان نیوز کی خبر کے مطابق امریکی صدر ڈونلڈ ٹرمپ نے اعلان کیا ہے کہ اسرائیل اور لبنان کے درمیان 10 روزہ جنگ بندی پر اتفاق ہو گیا ہے، جس کا آغاز امریکی وقت کے مطابق شام 5 بجے سے ہوگا۔ یہ پیش رفت ایسے وقت میں سامنے آئی ہے جب خطے میں جاری کشیدگی نے لبنان کو شدید انسانی بحران سے دوچار کر دیا ہے۔
ٹرمپ کے مطابق یہ معاہدہ لبنانی صدر جوزف عون اور اسرائیلی وزیرِاعظم بینجمن نیتن یاہو کے ساتھ رابطوں کے بعد طے پایا۔ انہوں نے کہا کہ دونوں ممالک نے امن کے لیے یہ اہم قدم اٹھانے پر رضامندی ظاہر کی ہے، جبکہ امریکی حکام کو ہدایت دی گئی ہے کہ وہ اس جنگ بندی کو مستقل امن میں بدلنے کے لیے کام کریں۔
رپورٹس کے مطابق 2 مارچ سے جاری جھڑپوں میں لبنان میں 2,100 سے زائد افراد جان سے ہاتھ دھو بیٹھے جبکہ 12 لاکھ سے زیادہ شہری نقل مکانی پر مجبور ہوئے۔ دوسری جانب اسرائیل کا کہنا ہے کہ حزب اللہ کے حملوں میں اس کے دو شہری اور 13 فوجی ہلاک ہوئے۔
لبنانی صدر جوزف عون نے جنگ بندی کو مذاکرات کے آغاز کے لیے بنیادی شرط قرار دیتے ہوئے جنوبی لبنان سے اسرائیلی افواج کے انخلا پر زور دیا ہے۔
تاہم جنگ بندی کے اعلان کے باوجود جنوبی لبنان میں اسرائیلی کارروائیاں جاری رہیں، جہاں بنت جبیل سمیت مختلف علاقوں کو نشانہ بنایا گیا، جبکہ دریائے لیتانی پر ایک اہم پل کی تباہی نے کئی علاقوں کا زمینی رابطہ منقطع کر دیا۔
امریکی صدر نے عندیہ دیا ہے کہ دونوں ممالک کی قیادت کو جلد واشنگٹن مدعو کیا جائے گا تاکہ دہائیوں بعد شروع ہونے والا یہ سفارتی عمل آگے بڑھایا جا سکے۔
