واشنگٹن میں اسرائیل–لبنان مذاکرات کا دوسرا دور، جنگ بندی کے بعد امن کی نئی امید

اردو انٹرنیشنل (مانیٹرنگ ڈیسک) ایکسپریس ٹریبیون کی خبر  کے مطابق اسرائیل اور لبنان کے درمیان کشیدگی کم کرنے کی کوششیں تیز ہو گئی ہیں، جہاں دونوں ممالک کے نمائندے جمعرات کو امریکہ میں مذاکرات کے دوسرے دور میں شرکت کریں گے۔ امریکی محکمہ خارجہ کے مطابق یہ بات چیت سفیر سطح پر ہوگی اور اس کا مقصد حالیہ جنگ بندی کو مستحکم بنانا اور مستقل امن کی راہ ہموار کرنا ہے۔

امریکی حکام کا کہنا ہے کہ وہ دونوں فریقین کے درمیان براہِ راست اور بامقصد مذاکرات کو جاری رکھنے کیلئے پرعزم ہیں۔ یاد رہے کہ 14 اپریل کو ہونے والا پہلا دور کئی دہائیوں بعد دونوں ممالک کے درمیان براہِ راست رابطے کی اہم پیش رفت تھا۔

یہ مذاکرات ایسے وقت میں ہو رہے ہیں جب اسرائیل اور لبنان کے درمیان 10 روزہ جنگ بندی نافذ ہے، جس نے وقتی طور پر لڑائی کو روک دیا ہے، تاہم صورتحال اب بھی نازک ہے۔ اسرائیلی افواج جنوبی لبنان کے کچھ علاقوں میں موجود ہیں اور اسے سیکیورٹی بفر زون قرار دیا جا رہا ہے۔

دوسری جانب اسرائیل نے سرحدی علاقوں کے رہائشیوں کو دریائے لیتانی کے قریب نہ جانے کی ہدایت کی ہے، جبکہ حزب اللہ نے اپنے ردعمل میں مزاحمت کا حق برقرار رکھنے کا عندیہ دیا ہے۔

لبنانی پارلیمان کے اسپیکر نبیہ بری کے مطابق امریکہ جنگ بندی میں توسیع کیلئے بھی متحرک ہے تاکہ مذاکراتی عمل کو مزید تقویت دی جا سکے۔ تجزیہ کاروں کا کہنا ہے کہ یہ بات چیت خطے میں پائیدار استحکام کیلئے اہم ثابت ہو سکتی ہے، تاہم حتمی پیش رفت دونوں فریقین کے عملی اقدامات پر منحصر ہوگی۔