پاک بھارت ٹاکرا: چیئرمین پی سی بی محسن نقوی کا کولمبو جانے کا امکان

ٹی ٹوئنٹی ورلڈ کپ کے سلسلے میں چیئرمین پاکستان کرکٹ بورڈ محسن نقوی کا سری لنکا جانے کا امکان ہے ذرائع کے مطابق وہ کولمبو پہنچ کر قومی ٹیم سے ملاقات کریں گے اور اہم میچ کی تیاریوں کا جائزہ لیں گے۔

اطلاعات کے مطابق بنگلہ دیش کرکٹ بورڈ کے صدر امین الاسلام بھی کولمبو پہنچیں گے، جبکہ ایشیائی کرکٹ کونسل کے دیگر اراکین اور عالمی کرکٹ کونسل کے اعلیٰ عہدیداران کی آمد بھی متوقع ہے۔

پاکستان اور بھارت کا اہم مقابلہ اتوار کو کولمبو میں شیڈول ہے محکمہ موسمیات کے مطابق آئندہ دو سے تین دن شہر میں کہیں ہلکی اور کہیں تیز بارش کا امکان ہے، جس کے باعث میچ کی صورتحال پر گہری نظر رکھی جا رہی ہے۔

قومی ٹیم نے دو روزہ وقفے کے بعد جمعہ کو تربیتی سیشن کا آغاز کیا، جس میں کھلاڑیوں نے بولنگ، بیٹنگ اور میدان میں کھیل کی مشقیں کیں بھارتی ٹیم دہلی سے کولمبو پہنچ چکی ہے، تاہم اوپنر ابھیشک شرما کی پاکستان کے خلاف میچ میں شرکت ابھی غیر یقینی ہے۔