وزیراعظم شہباز شریف کا امن کوششوں پر اعتماد، چار ملکی اجلاس کے بعد عالمی تعاون پر اظہارِ تشکر

اردو انٹرنیشنل (مانیٹرنگ ڈیسک) ڈان نیوز خبر  کے مطابق وزیر اعظم شہباز شریف نے مشرقِ وسطیٰ کی صورتحال پر ہونے والے چار ملکی اجلاس کے بعد سعودی عرب، ترکیہ اور مصر کے وزرائے خارجہ کا شکریہ ادا کرتے ہوئے خطے میں امن کے قیام کے لیے پاکستان کے عزم کو دہرایا ہے۔

نائب وزیر اعظم و وزیر خارجہ اسحاق ڈار کی زیر صدارت ہونے والی اس اہم مشاورت میں پاکستان کے ساتھ سعودی عرب، ترکیہ اور مصر نے شرکت کی، جہاں امریکا اور ایران کے درمیان جاری کشیدگی کم کرنے کے لیے مشترکہ حکمت عملی پر غور کیا گیا۔ ایک ماہ سے جاری اس تنازع نے خطے میں عدم استحکام کے ساتھ ساتھ عالمی توانائی کی صورتحال کو بھی متاثر کیا ہے۔

وزیراعظم نے سعودی وزیر خارجہ شہزادہ فیصل بن فرحان سے ملاقات کو خوش آئند قرار دیتے ہوئے سعودی عرب کے تحمل کو سراہا اور مسلم دنیا میں اتحاد کی ضرورت پر زور دیا۔ انہوں نے کہا کہ پاکستان اور سعودی عرب خطے میں امن و استحکام کے لیے قریبی رابطہ رکھیں گے۔

 ترکیہ کے وزیر خارجہ حقان فدان اور مصر کے وزیر خارجہ بدر بدلتی  سے ملاقاتوں میں بھی وزیراعظم نے فوری جنگ بندی اور مذاکرات کی ضرورت پر زور دیا، اور کہا کہ جاری کشیدگی سے نہ صرف انسانی جانوں بلکہ معیشت اور انفراسٹرکچر کو بھی شدید نقصان پہنچ رہا ہے۔

وزیراعظم نے واضح کیا کہ پاکستان ایران اور امریکا کو مذاکرات کی میز پر لانے کے لیے اپنی سفارتی کوششیں جاری رکھے ہوئے ہے اور اگر دونوں فریق آمادہ ہوں تو اسلام آباد ان مذاکرات کی میزبانی کے لیے تیار ہے۔

سفارتی ذرائع کے مطابق ممکنہ بات چیت میں امریکی وزیر خارجہ مارکو روبیو اور ایرانی وزیر خارجہ عباس اراغچی کی شرکت متوقع ہے، تاہم حتمی پیش رفت آئندہ چند روز میں متوقع ہے۔