Ishaq Dar active despite minor shoulder fracture, accident while receiving Egyptian Foreign Minister
اردو انٹرنیشنل (مانیٹرنگ ڈیسک) ڈان نیوز خبر کے مطابق نائب وزیر اعظم اور وزیر خارجہ اسحاق ڈار مصری ہم منصب کے استقبال کے دوران پھسل کر گرنے کے باعث کندھے میں معمولی نوعیت کی فریکچر کا شکار ہو گئے، تاہم انہوں نے تکلیف کے باوجود اپنی تمام سرکاری مصروفیات مکمل کیں۔
وزیر خارجہ کے صاحبزادے علی ڈار نے سوشل میڈیا پر جاری بیان میں بتایا کہ یہ واقعہ اتوار کے روز اس وقت پیش آیا جب بدر بدلتی اسلام آباد پہنچے اور ان کا استقبال کیا جا رہا تھا۔ انہوں نے کہا کہ اسحاق ڈار نے چوٹ کے باوجود دن بھر کی اہم سفارتی ملاقاتیں درد کم کرنے والی ادویات کے ساتھ مکمل کیں۔
بیان کے مطابق رات تقریباً 9 بجے، تمام سرکاری مصروفیات کے بعد ڈاکٹرز نے ان کا معائنہ کیا، جس میں ایکسرے مجموعی طور پر تسلی بخش آئے تاہم کندھے میں ہیر لائن فریکچر کی تصدیق ہوئی۔ آئندہ چند دنوں میں ادویات اور احتیاطی تدابیر کے ذریعے تکلیف کو کنٹرول کیا جائے گا۔
یہ واقعہ ایسے وقت پیش آیا جب اسلام آباد میں پاکستان، سعودی عرب، ترکیہ اور مصر کے درمیان اہم چار ملکی اجلاس جاری تھا، جس میں مشرقِ وسطیٰ کی کشیدہ صورتحال اور امریکا و ایران کے درمیان جاری تنازع میں کمی کے لیے سفارتی کوششوں پر غور کیا گیا۔
اجلاس کے بعد گفتگو کرتے ہوئے اسحاق ڈار نے کہا کہ شریک ممالک نے جنگ کے انسانی اور معاشی اثرات پر تشویش کا اظہار کیا اور اس بات پر اتفاق کیا کہ جاری کشیدگی کسی کے مفاد میں نہیں۔ انہوں نے فوری جنگ بندی، مسلم ممالک کے اتحاد اور مذاکرات کے ذریعے مسئلے کے حل کی ضرورت پر زور دیا۔
