بھارتی امپائر انیل چوہدری نے عثمان طارق کا بولنگ ایکشن قانونی قرار دے دیا

آئی سی سی ٹی20 ورلڈ کپ میں پاکستان اور بھارت کے اہم مقابلے سے قبل پاکستانی اسپنر عثمان طارق کے بولنگ ایکشن پر جاری بحث کے درمیان بھارت کے معروف انٹرنیشنل امپائر انیل چوہدری نے بھی ان کا ایکشن قانونی قرار دے دیا ہے۔

ایک بھارتی ڈیجیٹل پروگرام میں گفتگو کرتے ہوئے انیل چوہدری نے واضح کیا کہ عثمان طارق کا بولنگ ایکشن مکمل طور پر قوانین کے مطابق ہے اور وہ ہر گیند اپنے مخصوص اور مستقل انداز میں کرتے ہیں، جس میں کسی غیرقانونی تبدیلی کی گنجائش نظر نہیں آتی۔

ان کے مطابق مسئلہ اسی صورت میں پیدا ہوسکتا ہے جب کوئی بولر اپنے روٹین ایکشن سے ہٹ کر گیند کرے، بصورت دیگر اعتراض کی کوئی بنیاد نہیں بنتی۔

اس سے قبل سابق بھارتی کرکٹر روی چندرن ایشون بھی اس معاملے پر وضاحت کرچکے ہیں کہ بولنگ ایکشن کی حتمی جانچ آئی سی سی کے منظور شدہ ٹیسٹنگ سینٹر میں ہوتی ہے اور قوانین کے تحت بازو کے 15 ڈگری تک خم کو جائز قرار دیا گیا ہے۔

واضح رہے کہ عثمان طارق ٹی20 ورلڈ کپ میں امریکا کے خلاف میچ میں شرکت کرچکے ہیں اور مؤثر کارکردگی کا مظاہرہ بھی کیا۔

ماہرین اور امپائرز کی وضاحت کے بعد یہ تاثر مزید مضبوط ہوا ہے کہ ان کا بولنگ ایکشن قواعد کے مطابق ہے اور اٹھائے جانے والے اعتراضات کی کوئی ٹھوس بنیاد موجود نہیں۔