فٹ بال ایسوسی ایشن کا چیلسی اور فاریسٹ پر کھلاڑیوں کو کنٹرول کرنے میں ناکامی کا الزام

اردو انٹرنیشنل (اسپورٹس ویب ڈیسک) تفصیلات کے مطابق اسٹامفورڈ برج پر پریمیئر لیگ کے ایک میچ میں چیلسی اور ناٹنگھم فاریسٹ کے کھلاڑیوں کے درمیان تکرار دیکھنے میں‌ آئی جس پر فٹ بال ایسوسی ایشن (ایف اے) نے چیلسی اور ناٹنگھم فاریسٹ پر بحث کے دوران اپنے کھلاڑیوں کو کنٹرول نہ کرنے کا الزام عائد کیا ہے۔ جھگڑا کھیل کے اختتام پر ہوا جو 1-1 کی برابری پر ختم ہوا۔

یہ صورتحال اس وقت سامنے آئی جب فاریسٹ کے نیکو ولیمز چیلسی کے مارک کوکوریلا کو میدان سے باہر دھکیلتے نظر آئے۔ جس کے بعد دونوں ٹیموں کے کھلاڑی آمنے سامنے آگئے۔ اس دوران چیلسی کے نکولس جیکسن فاریسٹ موراٹو کو تھپڑ مارتے ہوئے نظر آئے، تاہم جیکسن کو کوئی سزا نہیں دی جائے گی کیونکہ اس واقعے کا ویڈیو اسسٹنٹ ریفری (وی اے آر) نے جائزہ لیا تھا۔

ایف اے نے کہا ہے کہ دونوں کلب اپنے کھلاڑیوں کو قابو کرنے میں ناکام رہے، جس کی وجہ سے میچ کے 88ویں منٹ میں کھلاڑیوں کے درمیان ایک دوسرے کو اشتعال دلانے والی صورتحال پیدا ہوئی۔ چیلسی اور ناٹنگھم فاریسٹ کو ان الزامات پر جواب دینے کے لیے جمعرات تک کا وقت دیا گیا ہے۔

جھگڑے کے دوران، تین کھلاڑیوں کو پیلا کارڈ دیا گیا: ناٹنگھم فاریسٹ کے نیکو ولیمز، اور چیلسی کے مارک کوکوریلا اور لیوی کولویل کو ۔ مجموعی طور پر، چیلسی کے چھ کھلاڑیوں کو میچ کے دوران پیلا کارڈ ملا، جس کی وجہ سے ان پر50,000 پاؤنڈ کا جرمانہ عائد ہوگا کیونکہ یہ اس سیزن میں دوسرا موقع ہے کہ چیلسی کو ایک ہی میچ میں چھ یا اس سے زیادہ پیلے کارڈ ملے ہیں۔