Important meeting with Saudi leadership, Prime Minister thanks for economic cooperation—peace and defense partnership further strengthened
اردو انٹرنیشنل (مانیٹرنگ ڈیسک)ایکسپریس ٹریبیون ی خبر کے مطابق وزیراعظم شہباز شریف نے سعودی ولی عہد محمد بن سلمان سے ملاقات میں پاکستان کی معاشی معاونت پر شکریہ ادا کرتے ہوئے دونوں ممالک کے درمیان دفاعی اور سکیورٹی تعاون کو مزید مضبوط بنانے کے عزم کا اعادہ کیا ہے۔
وزیراعظم آفس کے مطابق ملاقات میں وزیراعظم نے سعودی عرب کی مسلسل حمایت کو سراہتے ہوئے کہا کہ مشکل وقت میں مملکت کا تعاون پاکستان کیلئے انتہائی اہم رہا ہے۔ انہوں نے خطے کی موجودہ صورتحال میں سعودی قیادت کے محتاط اور ذمہ دارانہ کردار کو بھی سراہا۔
یہ پیش رفت ایسے وقت میں سامنے آئی ہے جب سعودی عرب پاکستان کیلئے 3 ارب ڈالر کے اضافی ڈپازٹ کا اعلان کر چکا ہے، جبکہ موجودہ 5 ارب ڈالر ڈپازٹ کو بھی مزید طویل مدت کیلئے بڑھا دیا گیا ہے، جس سے زرمبادلہ ذخائر کو استحکام ملنے کی توقع ہے۔
ملاقات میں دونوں رہنماؤں نے پاکستان اور سعودی عرب کے دیرینہ تعلقات کو مزید وسعت دینے پر اتفاق کیا اور اسے ایک مضبوط اور پائیدار شراکت داری قرار دیا۔
مزید پڑھیں : تہران میں عاصم منیر کی اہم ملاقاتیں ، ایران-امریکا کشیدگی کم کرنے کیلئے پاکستان متحرک
وزیراعظم نے سعودی قیادت کو ایران اور امریکا کے درمیان کشیدگی کم کرنے کیلئے پاکستان کی سفارتی کوششوں پر بھی بریفنگ دی اور کہا کہ اسلام آباد خطے میں پائیدار امن کیلئے اپنا کردار جاری رکھے گا۔
وزیراعظم اس وقت اپنے تین ملکی دورے پر ہیں اور سعودی عرب کے بعد قطر اور ترکیہ میں بھی اعلیٰ سطحی ملاقاتیں کریں گے، جہاں علاقائی صورتحال اور دوطرفہ تعلقات زیر بحث آئیں گے۔
دورے کے دوران وزیراعظم نے مدینہ منورہ میں مسجد نبویؐ پر حاضری دی، نوافل ادا کیے اور ملک و امت مسلمہ کیلئے خصوصی دعائیں بھی کیں۔
