Major US operation in the Strait of Hormuz 16 Iranian mine boats destroyed, Trump issues stern warning
اردو انٹرنیشنل (مانیٹرنگ ڈیسک) رائٹرز کی خبر کے مطابق مشرقِ وسطیٰ میں جاری کشیدگی کے دوران امریکا نے دعویٰ کیا ہے کہ اس کی فوج نے آبنائے ہرمز کے قریب ایران کی 16 بارودی سرنگیں بچھانے والی کشتیوں کو تباہ کر دیا ہے۔ امریکی صدر ڈونلڈ ٹرمپ نے ایران کو خبردار کرتے ہوئے کہا ہے کہ اگر اس نے اس اہم سمندری راستے میں بارودی سرنگیں بچھائی ہیں تو انہیں فوری طور پر ہٹا دیا جائے۔
امریکی سینٹرل کمانڈ کے مطابق منگل کے روز کی گئی کارروائی میں ان کشتیوں کو نشانہ بنایا گیا جو مبینہ طور پر آبنائے ہرمز میں بارودی سرنگیں بچھانے کی تیاری کر رہی تھیں۔ اس سے قبل ٹرمپ یہ بھی کہہ چکے ہیں کہ امریکا 10 غیر فعال مائن بچھانے والی کشتیوں کو مکمل طور پر تباہ کر چکا ہے۔
صدر ٹرمپ نے اپنے سوشل میڈیا پلیٹ فارم ٹروتھ سوشل پر بیان دیتے ہوئے کہا کہ اگر ایران نے آبنائے ہرمز میں کسی قسم کی بارودی سرنگیں بچھائی ہیں تو انہیں فوراً ہٹا دیا جائے، بصورت دیگر اسے فوجی نتائج کا سامنا کرنا پڑ سکتا ہے۔
مزید پڑھیں : ایران جنگ کے اثرات: امریکا اور اسرائیل کی لڑائی کا بڑا دباؤ یو اے ای پر
پینٹاگون کے مطابق امریکی فوج ایرانی کشتیوں کے ساتھ ساتھ بارودی مواد کے ذخائر کو بھی نشانہ بنا رہی ہے۔ دوسری جانب امریکا اور اسرائیل کی ایران کے خلاف جاری جنگ کے باعث آبنائے ہرمز کے راستے تیل کی ترسیل شدید متاثر ہوئی ہے۔
ادھر امریکی فوج کے جنرل ڈین کین نے کہا ہے کہ امریکا آبنائے ہرمز سے گزرنے والے تجارتی جہازوں کو ممکنہ فوجی تحفظ فراہم کرنے کے مختلف آپشنز پر غور کر رہا ہے، تاہم ابھی تک کسی آئل ٹینکر کو امریکی بحریہ کی باقاعدہ اسکواڈ فراہم نہیں کی گئی۔
دوسری جانب ایران کی پاسدارانِ انقلاب کے ترجمان علی محمد نائینی نے خبردار کیا ہے کہ اگر امریکا یا اس کے اتحادیوں نے خطے میں کسی قسم کی جارحانہ حرکت کی تو ایرانی میزائل اور ڈرون ان کا راستہ روکنے کی صلاحیت رکھتے ہیں۔
