The effects of the war in Lebanon are serious, with more than 500,000 people forced to flee their homes.
اردو انٹرنیشنل (مانیٹرنگ ڈیسک) الجزیرہ نیوز کی خبر کے مطابق اسرائیل اور حزب اللہ کے درمیان دوبارہ شروع ہونے والی جھڑپوں کے بعد لبنان میں انسانی بحران شدت اختیار کر گیا ہے اور پانچ لاکھ سے زائد افراد اپنے گھروں سے نقل مکانی پر مجبور ہو گئے ہیں۔
لبنان کی وزیر سماجی امور حنین السید نے اتوار کو بتایا کہ وزارت کے آن لائن نظام میں اب تک 517,000 افراد بے گھر ہونے کے طور پر رجسٹر ہو چکے ہیں۔ ان میں سے 117,228 افراد سرکاری پناہ گاہوں میں مقیم ہیں۔
لبنان کی وزارت صحت کے مطابق گزشتہ ایک ہفتے کے دوران اسرائیلی حملوں میں 394 افراد ہلاک ہوئے ہیں جن میں 83 بچے، 42 خواتین اور 9 امدادی کارکن بھی شامل ہیں۔
اتوار کی صبح اسرائیلی ڈرون نے بیروت کے ساحلی علاقے راوشے میں ایک ہوٹل کے کمرے کو نشانہ بنایا۔ حکام کے مطابق اس حملے میں کم از کم 4 افراد ہلاک اور 10 زخمی ہوئے۔ اسرائیلی فوج کا کہنا ہے کہ کارروائی میں ایران کی قدس فورس کے پانچ سینئر کمانڈرز کو نشانہ بنایا گیا۔
اسرائیلی فوج نے تصدیق کی ہے کہ جنوبی لبنان میں جھڑپوں کے دوران دو اسرائیلی فوجی بھی ہلاک ہوئے ہیں۔
اسرائیلی زمینی افواج بھی جنوبی لبنان کے سرحدی علاقوں میں پیش قدمی کر رہی ہیں جبکہ سرحد پر ٹینک اور بکتر بند گاڑیاں جمع ہونے سے ممکنہ زمینی حملے کے خدشات بڑھ گئے ہیں۔
لبنان کے وزیر اعظم نواف سلام نے خبردار کیا ہے کہ ملک ایک ایسی تباہ کن جنگ میں گھسیٹا جا رہا ہے جس کا لبنان نے انتخاب نہیں کیا تھا، اور بڑے پیمانے پر نقل مکانی سنگین انسانی اور سیاسی بحران کو جنم دے سکتی ہے۔
