کراچی کے ساحلی علاقے میں دو بحری جہازوں کی ٹکر، متعدد کنٹینرز سمندر میں گر گئے ، تحقیقات کا آغاز

اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق کراچی پورٹ کے داخلی راستے کے قریب دو غیر ملکی بحری جہازوں کے درمیان تصادم کے واقعے کی تحقیقات شروع کر دی گئی ہیں۔ حکام کے مطابق حادثے میں کسی قسم کا جانی نقصان یا زخمی ہونے کی اطلاع نہیں ملی۔

کراچی پورٹ ٹرسٹ کے مطابق یہ واقعہ 28 مئی کی شام تقریباً 7:30 سے 8:00 بجے کے درمیان فیئر وے بوائے کے قریب پیش آیا۔ حادثے کے بعد فوری طور پر میرین ریسکیو ٹیمیں موقع پر پہنچ گئیں اور امدادی کارروائیاں شروع کی گئیں۔

حکام کے مطابق لائبیریا کے پرچم بردار کنٹینر جہاز ایم وی پوپو، جو برتھ 8 اور 9 سے روانہ ہوا تھا، متحدہ عرب امارات کے پرچم بردار کیبل رپیئرنگ جہاز ایم وی نیوا سے ٹکرا گیا۔

ابتدائی معلومات کے مطابق ایم وی نیوا پائلٹ سوار کرنے کے انتظار میں آہستہ رفتار سے چینل کی طرف بڑھ رہا تھا۔ تصادم کے نتیجے میں ایم وی پوپو کے کچھ کنٹینرز سمندر میں جا گرے، تاہم کوئی جانی نقصان رپورٹ نہیں ہوا۔

وفاقی وزیر برائے بحری امور جنید انور چوہدری نے واقعے کا نوٹس لیتے ہوئے تحقیقات کا حکم دے دیا ہے۔ ان کا کہنا ہے کہ حادثہ اگرچہ پورٹ کی حدود سے باہر پیش آیا، تاہم اس کی وجوہات جاننے کے لیے تفصیلی رپورٹ طلب کر لی گئی ہے۔

انہوں نے بروقت ریسکیو آپریشن پر کے پی ٹی حکام کو سراہتے ہوئے کہا کہ ابتدائی طور پر واقعہ دونوں جہازوں کے عملے کی غفلت کے باعث پیش آیا۔

وفاقی وزیر کے مطابق متاثرہ کیبل جہاز کو کے پی ٹی ٹگ بوٹس کی مدد سے بحفاظت بندرگاہ منتقل کر دیا گیا ہے، جبکہ واقعے کی مکمل تحقیقات جاری ہیں۔

حکام نے کہا ہے کہ بحری سلامتی کو یقینی بنانے کے لیے تمام ضروری اقدامات کیے جا رہے ہیں اور رپورٹ کی روشنی میں مزید کارروائی عمل میں لائی جائے گی۔