شنگھائی تعاون تنظیم کا 23واں سربراہی اجلاس آج سے اسلام آباد میں شروع ہو گا
اردو انٹرنیشنل (مانیٹرنگ ڈیسک) شنگھائی تعاون تنظیم (ایس سی او) کا 23واں سربراہی اجلاس آج سے اسلام آباد کے جناح کنونشن سینٹر میں شروع ہو رہا ہے۔ پاکستان کے وزیراعظم شہباز شریف اجلاس کی صدارت کریں گے۔
تنظیم کے رکن ممالک روس، چین، بیلاروس، قازقستان، کرغزستان، تاجکستان، اور ازبکستان کے وزرائے اعظم کے علاوہ ایران کے اول نائب صدر اور انڈیا کے وزیر خارجہ اپنے ممالک کی نمائندگی کریں گے۔
چین کے وزیراعظم لی چیانگ اپنے ملک کی نمائندگی کریں گے۔
منگولیا کے وزیراعظم مبصر ریاست کے طور پر اور ترکمانستان کے وزرا کی کابینہ کے نائب چیئرمین اور وزیر خارجہ بھی خصوصی مہمان کی حیثیت میں شرکت کریں گے۔
شنگھائی تعاون تنظیم کونسل کے رکن ممالک کے سربراہان اجلاس میں معیشت، تجارت، ماحولیات اور سماجی و ثقافتی روابط کے شعبوں میں تعاون پر بات چیت کریں گے اور تنظیم کی کارکردگی کا جائزہ لیں گے۔
وزیراعظم شہبازشریف اجلاس کے موقع پر دورے پرآئے ہوئے وفود کے سربراہان سے اہم دوطرفہ ملاقاتیں بھی کریں گے۔
شنگھائی تعاون تنظیم کے اجلاس کے موقع پر غیرملکی سربراہان، وفود اور مہمانوں کی سکیورٹی کے لیے سخت انتظامات کیے گئے ہیں۔
اس حوالے سے اسلام آباد پولیس، سندھ پولیس، ایف سی اور رینجرز سمیت پاکستانی فوج کے دستے تعینات کیے گئے ہیں۔
ایس سی او اجلاس کی مناسبت سے وفاقی حکومت نے فوج کو سکیورٹی انتظامات کے لیے خصوصی اختیارات دیے ہیں۔