ریچل ریوز برطانیہ کی پہلی خاتون وزیر خزانہ مقرر
اردو انٹرنیشنل (مانیٹرنگ ڈیسک) برطانیہ کے نو منتخب وزیراعظم سر کئیر اسٹارمر نے 45 سالہ ریچل ریوز کو ملک کا وزیر خزانہ مقرر کیا ہے۔
برطانوی میڈیا رپورٹس کے مطابق شطرنج کی چائلڈ چیمپئن اور بینک آف انگلینڈ کی اکانومسٹ ریچل ریوز برطانوی سیاسی تاریخ میں پہلی خاتون وزیر خزانہ ہیں۔
ریچل ریوز نے مشکل حالات کے باوجود ملکی معیشت کو بہتر کرنے کے عزم کا اعادہ کیا ہے۔
برطانیہ میں حال ہی میں ہونے والے پارلیمانی انتخابات میں لیبر پارٹی کی بھاری اکثریت سے کامیابی کے بعد کنزرویٹو پارٹی کے 14 سالہ اقتدار کا خاتمہ ہوا اور لیبر پارٹی کی فتح کے ساتھ ہی ریچل ریوز ایکس چیکر کی چانسلر منتخب ہوئیں۔
ریچل ریوز نے ایکس چیکر کی چانسلر منتخب ہونے کے بعد سوشل میڈیا پر لکھا کہ یہ ہر اس لڑکی اور خاتون کے لیے جو یہ پڑھ رہا ہے کہ آج یہ ظاہر کریں کہ آپ کے مقاصد کی کوئی حد نہیں ہے۔
خیال رہے کہ لیبر پارٹی نے اپنے انتخابی منشور میں برطانیہ کی معیشت کو سرفہرست رکھتے ہوئے معاشی ترقی کو حکومت کی اولین ترجیح قرار دیا ہے۔
اس حوالے سے ریچل ریوز کا کہنا ہے کہ معاشی ترقی ہمارا مشن ہے، چلیں اب کام کرتے ہیں۔
