وزیر اعظم شہباز شریف دو روزہ سرکاری دورے پر متحدہ عرب امارات روانہ

وزیراعظم شہبازشریف دو روزہ سرکاری دورے پر متحدہ عرب امارات روانہ ہوگئے ۔ وزیراعظم کو دورے کی دعوت دبئی کے فرمانروا شیخ محمد بن راشد آل مکتوم نے دی تھی۔

ترجمان دفتر خارجہ کے مطابق وزیراعظم کل دبئی میں ورلڈ گورنمنٹس سمٹ سے خطاب کریں گے۔ شہبازشریف یو اے ای کے وزیراعظم سے بھی منگل کو ہی ملاقات کریں گے ۔

شہبازشریف کی سری لنکا کے صدرانورا کمارا دیسا نائیکے سے بھی ملاقات طے ہے جس میں دوطرفہ تعاون پر تبادلہ خیال ہوگا ۔ وزیراعظم شہبازشریف کی کویتی وزیراعظم شیخ احمد ال عبداللہ الصباح اور بوسنیا کے وِزیراعظم نرمین نکسک سےبھی کل ملاقات طے ہے ۔

شہباز شریف یو ای اے میں مقیم پاکستانیوں ، دیگر کاروباری شخصیات اور سرمایہ کاروں سےبھی ملیں گے۔ نائب وزیرِاعظم اور وزیرِ خارجہ اسحاق ڈار، وفاقی وزرا خواجہ آصف ، محمد اورنگزیب ، احد خان چیمہ ، اویس لغاری ، عطاء اللہ تارڑ اور معاون خصوصی طارق فاطمی بھی ان کے ہمراہ ہیں ۔ شہبازشریف کاوزارت عظمیٰ کا منصب سنبھالنے کے بعد یو ای اے کا دوسرا دورہ ہے ۔