خیبر پختونخوا کی نئی نگران کابینہ نے حلف اٹھا لیا
نگران وزیراعلیٰ خیبر پختونخوا اعظم خان کی وفات کے بعد نگران کابینہ تحلیل ہوگئی تھی، نئے نگران وزیر اعلیٰ کی تعیناتی کے بعد آج خیبرپختونخوا کی نئی نگران کابینہ نے حلف اٹھا لیا۔
جسٹس ریٹائرڈ ارشد حسین شاہ نے گزشتہ روز اپنے عہدے کا حلف اٹھانے کے بعد صوبے کے معاملات چلانے کے لیے 10 رکنی کابینہ تشکیل دی جس کی سمری پر گورنر خیبر پختونخوا نے دستخط بھی کر دیے تھے۔
گورنرکے پی غلام علی نے نگران صوبائی کابینہ سے حلف لیا، تقریب حلف برداری گورنر ہاؤس کے پی میں ہوئی۔نگران صوبائی کابینہ میں سید مسعود شاہ، ارشاد قیصر اور آصف رفیق شامل ہیں، اس کے علاوہ نجیب اللہ، سید عامر عبداللہ اور فیروز جمال شاہ بھی کابینہ کا حصہ ہیں۔ احمد رسول بنگش، محمد قاسم خان، عامر ندیم اور احمد جان بھی کابینہ میں شامل ہیں۔
