محسن نقوی کی امریکی حکام سے ملاقات، انسدادِ دہشتگردی تعاون مزید مضبوط بنانے پر زور

اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق وفاقی وزیر داخلہ محسن نقوی اور جنوبی و وسطی ایشیا کے لیے امریکی نائب معاون وزیر خارجہ پال کپور کے درمیان اسلام آباد میں اہم ملاقات ہوئی، جس میں پاکستان اور امریکا کے درمیان سکیورٹی، انسدادِ دہشتگردی اور انسدادِ منشیات کے شعبوں میں تعاون مزید بڑھانے پر اتفاق کیا گیا۔

سرکاری اعلامیے کے مطابق ملاقات میں قائم مقام امریکی سفیر نیٹلی بیکر، وزیر مملکت برائے داخلہ طلال چوہدری اور وفاقی سیکریٹری داخلہ بھی شریک تھے۔ دونوں جانب سے پاک امریکا تعلقات، خطے کی مجموعی صورتحال اور مشرقِ وسطیٰ میں جاری کشیدگی پر تفصیلی تبادلۂ خیال کیا گیا۔

محسن نقوی نے کہا کہ پاکستان اور امریکا کے تعلقات باہمی اعتماد اور دیرینہ تعاون پر مبنی ہیں۔ انہوں نے بلوچستان میں ریکوڈک منصوبے پر کام کرنے والی امریکی کمپنیوں کو مکمل اور فول پروف سکیورٹی فراہم کرنے کی یقین دہانی بھی کرائی۔

وزیر داخلہ نے پاکستان اور امریکا کے درمیان براہِ راست پروازوں کی جلد بحالی کی ضرورت پر زور دیتے ہوئے کہا کہ اس سے دونوں ممالک کے درمیان تجارتی، سفارتی اور عوامی روابط مزید مستحکم ہوں گے۔

واضح رہے کہ امریکا رواں سال ریکوڈک کاپر اینڈ گولڈ منصوبے کے لیے 1.3 ارب ڈالر مختص کر چکا ہے، جبکہ منصوبے پر تعمیراتی کام جاری ہے اور تجارتی پیداوار 2028 میں متوقع ہے۔

ملاقات کے دوران مشرقِ وسطیٰ کی صورتحال بھی زیرِ بحث آئی۔ محسن نقوی نے امید ظاہر کی کہ ایران اور امریکا کے درمیان جاری کشیدگی کا جلد پُرامن حل نکل آئے گا، جبکہ امریکی نائب معاون وزیر خارجہ پال کپور نے خطے میں امن و استحکام کے لیے پاکستان کے کردار کو سراہا۔