محمود اچکزئی فضل الرحمان کے حق میں دستبردار ہوگئے
اردو انٹرنیشنل (مانیٹرنگ ڈیسک) پشتونخواہ میپ کے چیئرمین محمود خان اچکزئی پشین سے قومی اسمبلی کے حلقہ این اے 265سے مولانا فضل الرحمان کے حق میں دستبردار ہوگئے۔
تفصیلات کے مطابق الیکشن کمیشن کی جانب سے 8 فروری کو شیڈول عام انتخابات کے سلسلے میں آج امیدواروں کی جانب سے کاغذات نامزدگی واپس لینے کا آخری روز ہے اسی سلسلے میں پشتونخوا ملی عوامی پارٹی کی جانب سے جاری اعلامیے میں بتایا گیا ہے کہ چیئرمین محمودخان اچکزئی نے قومی اسمبلی کے حلقے کیلئے اپنے کاغذات واپس لے لئے ہیں۔
واضح رہے کہ الیکشن کمیشن آف پاکستان کی جانب سے امیدواروں کی نظرثانی شدہ فہرست 20 جنوری کو جبکہ کاغذات نامزدگی 22 جنوری کو واپس لئے جانے تھے اورعام انتخابات میں حصہ لینے والے امیدواروں کے دستبردار ہونے کا آج آخری روز ہے۔
کاغذات جمع کروانے والے امیدوارالیکشن سے دستبردار ہو کراپنے کاغذات نامزدگی واپس لے سکیں گے اورآج امیدواروں کی حتمی فہرست جاری کر دی جائے گی۔
جبکہ الیکشن کمیشن کی جانب سے کل الیکشن میں حصہ لینے والے امیدواروں کوانتخابی نشانات الاٹ کئے جائیں گے۔الیکشن کمیشن آف پاکستان کے مطابق امیدواروں کی حتمی فہرست جاری کریگا۔
