اردو انٹرنیشنل (مانیٹرنگ ڈیسک) ایکسپریس ٹریبیون کی خبر کے مطابق نائب وزیراعظم و وزیر خارجہ اسحاق ڈار نے شنگھائی تعاون تنظیم کے وزرائے خارجہ کونسل اجلاس کے موقع پر اپنے چینی ہم منصب وانگ ای سے ملاقات کی، جس میں دوطرفہ تعلقات، علاقائی صورتحال اور کثیرالجہتی تعاون کے مختلف پہلوؤں پر تفصیلی تبادلہ خیال کیا گیا۔
دفتر خارجہ کے مطابق دونوں وزرائے خارجہ کے درمیان خوشگوار ماحول میں ہونے والی ملاقات میں پاک چین اسٹریٹجک شراکت داری کو مزید مضبوط بنانے، علاقائی امن و استحکام اور مختلف بین الاقوامی فورمز پر قریبی تعاون جاری رکھنے کے عزم کا اعادہ کیا گیا۔
اسحاق ڈار نے علاقائی امن و استحکام کے لیے پاکستان کی سفارتی کوششوں کو سراہنے پر چینی وزیر خارجہ کا شکریہ ادا کیا، جبکہ وانگ ای نے پاکستان کو 2027 میں ایس سی او سربراہ اجلاس کی میزبانی اور تنظیم کی چیئرمین شپ سنبھالنے کے لیے نیک تمناؤں کا اظہار کیا۔
اس سے قبل اسحاق ڈار نے کرغزستان کے صدر صدر سادیر ژاپاروف سے بھی ملاقات کی، جس میں علاقائی و عالمی صورتحال، ایس سی او کے کردار اور رکن ممالک کے درمیان تعاون کے فروغ پر گفتگو ہوئی۔ وزیر خارجہ نے صدر آصف علی زرداری اور وزیراعظم شہباز شریف کی جانب سے نیک خواہشات بھی پہنچائیں۔
دفتر خارجہ کے مطابق اسحاق ڈار نے کرغزستان کی میزبانی کو سراہتے ہوئے کہا کہ پاکستان 2026-27 کی ایس سی او چیئرمین شپ سنبھالنے کے لیے دیگر رکن ممالک کے ساتھ قریبی تعاون جاری رکھے گا۔
اسحاق ڈار منیلا میں آسیان ریجنل فورم کے اجلاس میں شرکت کے بعد کرغزستان پہنچے، جہاں انہوں نے ایس سی او وزرائے خارجہ اجلاس میں پاکستان کی نمائندگی کی۔ اجلاس میں پاکستان، چین، روس، ایران، بھارت، بیلاروس، قازقستان، کرغزستان، تاجکستان اور ازبکستان سمیت تمام رکن ممالک کے وزرائے خارجہ شریک ہوئے۔
