اردو انٹرنیشنل (مانیٹرنگ ڈیسک)اے پی پی کی خبر کے مطابق وزیراعظم شہباز شریف کی زیر صدارت وزیراعظم آفس میں پارلیمانی جماعتوں کے رہنماؤں اور نمائندگان کا اہم اجلاس منعقد ہوا، جس میں ملک کو درپیش داخلی و خارجی صورتحال پر تفصیلی مشاورت کی گئی۔

اجلاس کے شرکاء کو پاکستان۔افغانستان سرحدی حالات، ایران اور مشرقِ وسطیٰ بالخصوص خلیجی خطے میں جاری کشیدگی کے حوالے سے ان کیمرہ بریفنگ دی گئی۔ حکام نے خطے کی تازہ پیش رفت، سفارتی روابط اور پاکستان کی جانب سے کی جانے والی کوششوں پر شرکاء کو اعتماد میں لیا۔

مزید پڑھیں : سعودی-پاکستانی دفاعی اتحاد عملی شکل میں: فضائی دفاعی نظام اور فوجی یونٹس تعینات

پارلیمانی رہنماؤں نے کھل کر اپنے خیالات کا اظہار کیا اور اس بات پر زور دیا کہ موجودہ نازک حالات میں قومی اتحاد اور سیاسی ہم آہنگی ناگزیر ہے۔ شرکاء نے خطے میں امن کے قیام کے لیے پاکستان کی سفارتی سرگرمیوں کو سراہتے ہوئے انہیں مزید تیز اور مؤثر بنانے کی ضرورت پر زور دیا۔

اجلاس میں ملک سے دہشتگردی کے مکمل خاتمے کے لیے غیر متزلزل عزم کا اعادہ کیا گیا۔ تمام جماعتوں نے اس بات پر اتفاق کیا کہ قومی سلامتی اور استحکام کے معاملے پر کوئی اختلاف نہیں ہونا چاہیے اور مربوط حکمتِ عملی کے ذریعے چیلنجز کا مقابلہ کیا جائے گا۔

شرکاء نے وسیع تر قومی مفاد میں تمام سیاسی قیادت کو اعتماد میں لینے کے وزیراعظم کے اقدام کو سراہا اور اسے مثبت پیش رفت قرار دیا۔ اجلاس کے اختتام پر اس عزم کا اظہار کیا گیا کہ پاکستان خطے میں امن، داخلی استحکام اور سفارتی توازن کے لیے فعال کردار ادا کرتا رہے گا۔