اردو انٹرنیشنل (مانیٹرنگ ڈیسک) ڈان نیوز کی رپورٹ کے مطابق راولپنڈی اور اسلام آباد کے مختلف علاقوں میں جمعرات کو مسلسل چوتھے روز بھی شدید بارش ہوئی جس سے نشیبی علاقوں کے مکینوں کی مشکلات بڑھ گئیں، جبکہ محکمہ موسمیات نے آج جمعہ کو بھی جڑواں شہروں سمیت بالائی پنجاب، کشمیر، بالائی و وسطی خیبرپختونخوا اور گلگت بلتستان میں بارش کی پیشگوئی کرتے ہوئے شہری سیلاب کا خدشہ ظاہر کیا ہے۔ محکمہ موسمیات کے مطابق اسلام آباد اور راولپنڈی کے علاوہ مردان، صوابی، پشاور، نوشہرہ، گوجرانوالہ، گجرات، سیالکوٹ اور لاہور کے نشیبی علاقوں میں بھی اربن فلڈنگ کا خطرہ ہے، جبکہ کشمیر، مری اور گلیات کے ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ بھی ظاہر کیا گیا ہے۔
ریسکیو 1122 حکام کے مطابق راولپنڈی ضلع میں جمعرات کی صبح مختلف واقعات کے دوران 12 افراد کو بحفاظت نکال کر محفوظ مقامات پر منتقل کیا گیا۔ ان میں ہکلا انٹرچینج سے تین، شاہ باغ سے پانچ اور کھڈکان گاؤں سے چار افراد شامل تھے۔ جہلم میں بھی ریسکیو ٹیموں نے سیلابی پانی میں پھنسے تین افراد کو نکالا اور محفوظ مقام پر منتقل کردیا۔ شدید بارش سے جہلم کی سڑکیں اور چھوٹے ڈیم متاثر ہوئے جبکہ دینہ تحصیل میں کلوال روڈ پر قائم پل بھی پانی میں بہہ گیا، جس کے باعث متعدد علاقوں کا زمینی رابطہ متاثر ہوا۔
محکمہ موسمیات کے مطابق بارش کے باعث درجہ حرارت کم ہوکر 30 ڈگری سینٹی گریڈ ہوگیا، تاہم ہوا میں نمی کا تناسب 79 فیصد رہا۔ اسلام آباد انٹرنیشنل ایئرپورٹ پر 66 ملی میٹر، گولڑہ میں 35، بوکرا میں 23، سیدپور میں 14 اور زیرو پوائنٹ پر 12 ملی میٹر بارش ریکارڈ ہوئی۔ راولپنڈی میں کٹاریان میں 46 ملی میٹر، پیرودھائی میں 31، گوالمنڈی میں 29، چکلالہ میں 25 اور شمس آباد میں 21 ملی میٹر بارش ریکارڈ کی گئی۔
آریہ محلہ کے رہائشی محمد نصیر نے بتایا کہ شدید بارش سے گھریلو نالیاں بند ہوگئیں اور اہل علاقہ نے سیلاب کے خوف میں رات گزاری۔ ان کا کہنا تھا کہ وہ گزشتہ 25 سال سے علاقے میں رہ رہے ہیں اور ہر سال اسی مسئلے کا سامنا کرتے ہیں، لیکن نکاسی آب اور نالہ لئی کی صفائی کے مستقل حل کے لیے کوئی مؤثر اقدام نہیں کیا گیا۔
بارش سے بازار کلاں، ڈنگی کھوئی، راجہ بازار، اکال گڑھ، ندیم کالونی، جاوید کالونی، ڈھوک رتہ، گنج منڈی، جامع مسجد روڈ، بنی چوک، صادق آباد، سیٹلائٹ ٹاؤن، کالج روڈ، بوہر بازار، نیا محلہ، موہن پورہ اور امرپورہ سمیت مختلف علاقے متاثر ہوئے۔
ادھر بارش اور کئی مقامات پر پانی جمع ہونے سے بجلی کے متعدد فالٹس بھی سامنے آئے، جن میں زیر زمین کیبل، اوورہیڈ ٹرانسفارمر اور فیڈر فالٹس شامل ہیں۔ آئیسکو چیف ایگزیکٹو چوہدری خالد محمود نے شہریوں کو بجلی کی تاروں، کھمبوں اور دیگر تنصیبات سے محفوظ فاصلہ رکھنے اور بارش کے دوران احتیاطی تدابیر اختیار کرنے کی ہدایت کی ہے۔
