کراچی سے 170 کلومیٹر دور ڈیپ ڈپریشن طاقتور طوفان میں تبدیل، تیسرا الرٹ جاری
اردو انٹرنیشنل (مانیٹرنگ ڈیسک) چیف میٹرولوجسٹ سردار سرفراز نے کہا ہے کہ رن آف کچ (بھارت) کے اوپر موجود کراچی سے 170 کلومیٹر دوری پر موجود ڈیپ ڈیپریشن اب سائیکلون کی صورت اختیار کرگیا ہے۔
سردار سرفراز نے کہا ڈیپ ڈیپریشن اب سائیکلون کی صورت اختیار کرگیا، اسنیٰ کراچی کے جنوب مشرق میں 170 کلومیٹر کے فاصلے پر موجود ہے، اس وقت اس کے زیر اثر شہر میں 60 سے 70 کلومیٹر فی گھنٹہ کی رفتار سے ہوائیں چل رہی ہیں۔
چیف میٹرولوجسٹ نے کہا کہ بارشوں کی شدت میں اضافہ ہوگا، رات میں تیز اسپیل متوقع ہے، اس سمندری طوفان کی سمت بلوچستان، عمان کی جانب ہے، بارشیں اسی سسٹم کے زیر اثر ہو رہی ہیں۔
دوسری جانب محکمہ موسمیات پاکستان (ایم ڈی پی) نے ٹراپیکل سائیکلون کا تیسرا الرٹ جاری کردیا ہے۔
محکمہ موسمیات کے جانب سے جاری کردہ تازہ ترین الرٹ میں کہا گیا ہے کہ بھارت کے رن آف کچ پر ڈیپ ڈپریشن 12 گھنٹوں کے دوران مغرب، جنوب مغرب کی جانب بڑھا۔
اس میں کہا گیا کہ ڈیپ ڈپریشن کراچی سے تقریباً 200 کلومیٹرمشرق، جنوب مشرق کے فاصلے پرموجود ہے، سمندری طوفان 70 کلومیٹرفی گھنٹہ کی رفتار سے چلنے والی تیز ہواؤں کے ساتھ ناہموار رہنے کا امکان ہے۔
محکمہ موسمیات نے کہا کہ سائیکلون مزید مغرب،جنوب مغرب کےجانب بڑھےگا، دوپہر یا شام تک سندھ کے ساحل کے ساتھ شمال مشرقی بحیرہ عرب میں ابھرےگا، سازگارماحول کے باعث یہ ڈیپ ڈپریشن سمندری طوفان میں تبدیل ہوسکتا ہے۔
جاری کردہ تیسرے الرٹ میں کہا گیا کہ سائیکلون کے زیر اثر کراچی، تھرپارکر، بدین، ٹھٹھہ میں موسلادھاربارش کاامکان ہے، سجاول، حیدرآباد، مٹیاری، عمرکوٹ، میرپورخاص، سانگھڑ، جامشورو، دادو اور شہید بینظیر آباد اضلاع میں بھی 31 اگست تک موسلادھار بارشیں متوقع ہیں۔
اس میں کہا گیا کہ حب، لسبیلہ، آواران، کیچ اور گوادر میں 30 اگست سے یکم ستمبر تک تیز بارش کا امکان ہے جب کہ سندھ کے ماہی گیروں کو 31 اگست، بلوچستان کے ماہی گیروں کویکم ستمبر تک سمندر میں نہ جانے کی ہدایت کی گئی ہے۔
قبل ازیں چیف میٹرولوجسٹ سردار سرفراز نے کہا کہ ہوا کا شدید ترین کم دباؤ آہستہ آہستہ مزید مغرب، جنوب مغرب کی جانب بڑھ رہاہے، ڈیپ ڈپریشن کراچی کے جنوب مشرق میں 200 کلومیٹر کے فاصلے پر ہے۔
انہوں نے کہا کہ آج سہ پہر اور شام کے درمیان یہ ایک طاقتور طوفان کی شکل اختیار کرسکتا ہے، طوفان کے بننے پر اس کی سمت مغرب، جنوب مغرب کی طرف رہنے کا امکان ہے۔
دوسری جانب محکمہ موسمیات پاکستان (پی ایم ڈی) نے اپنے تازہ ترین بیان میں کہا کہ ہوا کا شدیدکم دباؤ رن آف کچ (انڈیا)کے اوپر موجود ہے، اگلے 24 گھنٹوں کے دوران ہوا کا شدیدکم دباؤ سمندری طوفان میں تبدیل ہونے کا قوی امکان ہے۔
جاری بیان میں کہا گیا کہ موجودہ صورتحال کے باعث 31 اگست تک وقفے وقفے سےکراچی ڈویژن، تھرپارکر، بدین، ٹھٹھہ، سجاول، حیدرآباد، ٹنڈو محمد خان،ٹنڈو اللہ یار ، مٹیاری، عمرکوٹ، میرپورخاص، سانگھڑ، جامشورو، دادو اور شہید بینظیر آباد کے اضلاع میں شدید آندھی، موسلادھار، شدید طوفانی بارش کا امکان ہے۔
پی ایم ڈی نے کہا کہ 30 اگست سے ایک ستمبر کے دوران حب، لسبیلہ، آواران، کیچ اور گوادر کے اضلاع میں بھی وقفے وقفے سےشدید آندھی، موسلادھار، شدید طوفانی بارش کی پیشگوئی کی ہے۔
واضح رہے کہ گزشتہ رات پی ایم ڈی نے صوبہ سندھ کی ساحلی پٹی پر طوفان کا دوسرا الرٹ جاری کرتے ہوئے کہا تھا کہ ڈیپ ڈپریشن کراچی کے جنوب مشرق میں 250 کلومیٹر کے فاصلے پر موجود ہے۔
محکمہ موسمیات کی جانب سے جاری الرٹ میں کہا گیا تھا کہ ڈیپ ڈپریشن گزشتہ 12 گھنٹوں کے دوران بھارت سے جنوب مغرب کی جانب بڑھ گیا ہے۔
س حوالے سے کہا گیا کہ سمندری طوفان تیز ہواؤں کے ساتھ ناہموار رہنے کا امکان ہے اور ڈیپ ڈپریشن کل صبح تک سندھ کے ساحل کے ساتھ بحیرہ عرب میں ابھرے گا۔
ادارے نے بیان میں کہا کہ سازگار ماحولیاتی حالات کے باعث سمندری طوفان میں تبدیل ہوسکتا ہے اور سائیکلون کے زیر اثر کراچی میں موسلادھار بارش کا امکان ہے۔
اس کے علاوہ محکمہ موسمیات نے پیش گوئی کی ہے کہ کراچی شہر میں آج بھی بادل جم کربرسیں گے جب کہ گزشتہ 24 گھنٹے میں ریکارڈ کی گئ بارش کے اعدادو شمار بھی جاری کردیے گئے۔
