گوادر پورٹ کیلئے بڑا ریلیف پیکیج، عالمی شپنگ کمپنیوں کو خصوصی مراعات

اردو انٹرنیشنل (مانیٹرنگ ڈیسک) ڈان نیوز کی رپورٹ کے مطابق وفاقی حکومت نے گوادر پورٹ کو خطے کا اہم تجارتی اور لاجسٹکس مرکز بنانے کیلئے بڑے ریلیف پیکیج کا اعلان کرتے ہوئے مختلف ٹیرف اور پورٹ چارجز میں نمایاں کمی کردی ہے، جس سے عالمی شپنگ کمپنیوں، ٹرانزٹ ٹریڈ اور ٹرانس شپمنٹ سرگرمیوں میں اضافے کی توقع کی جارہی ہے۔

وفاقی وزیر برائے بحری امور جنید انور چوہدری نے پیر کو جاری سرکاری بیان میں بتایا کہ کنٹینر بردار جہازوں کی برتھنگ فیس میں 25 فیصد کمی کردی گئی ہے، جبکہ بین الاقوامی ٹرانس شپمنٹ کنٹینرز پر پورٹ چارجز 40 فیصد تک کم کیے گئے ہیں۔ اسی طرح ٹرانزٹ کنٹینر کارگو پر عائد مختلف چارجز میں بھی 31 فیصد تک رعایت دی گئی ہے۔

انہوں نے کہا کہ حکومت نے جنرل کارگو کیلئے ایک ماہ تک مفت اسٹوریج سہولت بھی متعارف کرائی ہے تاکہ تاجروں اور شپنگ کمپنیوں کے آپریشنل اخراجات کم ہوسکیں اور گوادر پورٹ کو خطے کی دیگر بندرگاہوں کے مقابلے میں زیادہ پرکشش بنایا جاسکے۔

جنید انور چوہدری کے مطابق نئی مراعات کا مقصد عالمی شپنگ لائنز کو گوادر پورٹ کی جانب راغب کرنا ہے۔ انہوں نے کہا کہ ٹرانزٹ اور ٹرانس شپمنٹ کارگو لانے والے جہازوں کو غیر معمولی ریلیف دیا گیا ہے، جبکہ موجودہ مراعات ملکی بندرگاہوں کے مقابلے میں ریکارڈ سطح کی ہیں۔

وفاقی وزیر نے کہا کہ گوادر کو ریجنل لاجسٹکس حب بنانے کی حکومتی پالیسی پر عملی اقدامات شروع ہوچکے ہیں اور توقع ہے کہ اس فیصلے سے نہ صرف بندرگاہ پر کارگو ہینڈلنگ بڑھے گی بلکہ معاشی سرگرمیوں میں بھی نمایاں تیزی آئے گی۔ ان کے مطابق لاجسٹکس، شپنگ اور ٹرانسپورٹ کے شعبوں میں نئے روزگار کے مواقع بھی پیدا ہوں گے۔

دریں اثنا، گوادر پورٹ اتھارٹی کے چیئرمین نورالحق بلوچ نے کہا ہے کہ آبنائے ہرمز میں جاری کشیدگی کے باعث گوادر پورٹ کی اسٹریٹجک اہمیت مزید بڑھ گئی ہے۔ 

انہوں نے کہا کہ گبد-ریمدان بارڈر روٹ ایران اور وسطی ایشیا کے ساتھ تجارت کے فروغ کیلئے ایک مؤثر ملٹی ماڈل کوریڈور کی شکل اختیار کرچکا ہے، جبکہ جدید انفرااسٹرکچر اور کم آپریشنل اخراجات گوادر کو مستقبل کا اہم علاقائی تجارتی مرکز بنا سکتے ہیں۔

نورالحق بلوچ نے مزید بتایا کہ اپریل 2026 کے دوران گوادر پورٹ پر چار ٹرانس شپمنٹ جہازوں کی آمد ریکارڈ کی گئی، جو اس بندرگاہ کی بڑھتی ہوئی علاقائی اہمیت اور تجارتی امکانات کا واضح اشارہ ہے۔