Iran threatens America, Gulf of Oman could become graveyard for American warships
اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق ایران نے امریکی بحری ناکہ بندی پر شدید ردعمل دیتے ہوئے خبردار کیا ہے کہ اگر واشنگٹن نے اپنی فوجی حکمتِ عملی تبدیل نہ کی تو خلیج عمان امریکی جنگی جہازوں کے لیے قبرستان بن سکتی ہے، جبکہ بڑھتی ہوئی کشیدگی کے باعث عالمی منڈی میں تیل کی قیمتیں بھی تیزی سے اوپر چلی گئی ہیں۔
ایرانی سپریم لیڈر کے عسکری مشیر میجر جنرل محسن رضائی نے سرکاری ٹی وی سے گفتگو میں کہا کہ امریکا کو خطے میں اپنی عسکری موجودگی ختم کرنی چاہیے۔ ان کا کہنا تھا کہ بحری ناکہ بندی جنگ کے مترادف ہے اور اس کا جواب دینا ایران کا قانونی اور فطری حق ہے۔
انہوں نے واضح کیا کہ ایران نے اب تک تحمل کا مظاہرہ کیا ہے لیکن اسے کمزوری نہ سمجھا جائے۔ ان کے مطابق آبنائے ہرمز تجارتی جہازوں کے لیے کھلی رہے گی، تاہم خطے میں فوجی نقل و حرکت اور سیکیورٹی کو غیر مستحکم کرنے کی اجازت نہیں دی جائے گی۔
دوسری جانب عالمی مارکیٹ میں خام تیل کی قیمتیں دو ہفتوں کی بلند ترین سطح پر پہنچ گئی ہیں۔ برینٹ کروڈ 111 ڈالر فی بیرل سے تجاوز کرگیا، جبکہ امریکی خام تیل 107 ڈالر فی بیرل تک جاپہنچا۔ ماہرین کا کہنا ہے کہ اگر ایران تنازع مزید طول پکڑتا ہے تو عالمی معیشت اور توانائی مارکیٹ پر دباؤ میں مزید اضافہ ہوسکتا ہے۔
ادھر اسرائیلی میڈیا رپورٹس کے مطابق اسرائیلی فوج کو ایران کے خلاف ممکنہ نئی کارروائیوں کے لیے ہائی الرٹ کردیا گیا ہے۔ رپورٹس میں دعویٰ کیا گیا کہ امریکی صدر ڈونلڈ ٹرمپ اور اسرائیلی وزیراعظم نیتن یاہو کے درمیان حالیہ رابطے میں بھی ایران کی صورتحال زیر بحث آئی۔
