اکثر علاقوں میں شدید دھند‘ حد نگاہ صفر ، موٹر وے بند کردی گئی
اردو انٹرنیشنل (مانیٹرنگ ڈیسک) ملک کے اکثر علاقوں میں شدید دھند کے باعث حد نگاہ صفر ہونے پر موٹر وے بند کردی گئی۔ تفصیلات کے مطابق صوبہ خیبرپختونخوا، پنجاب اور سندھ کے میدانی علاقے شدید دھند کی لپیٹ میں ہیں، جس کے وجہ سے حد نگاہ صفر ہونے پر موٹر وے کو مختلف مقامات سے بند کرنی پڑگئی۔
ترجمان موٹر وے پولیس نے بتایا ہے کہ ایم ٹو لاہور سے کوٹ مومن تک اور موٹر وے ایم تھری فیض پور سے رجانہ تک ٹریفک کیلئے بند ہے، اسی طرح دھند کے باعث موٹر وے ایم 4 شیر شاہ سے پنڈی بھٹیاں تک بند ہے اور موٹر وے ایم 5 شیر شاہ سے روہڑی تک گاڑیوں کا داخلہ ممنوع ہے۔
ترجمان موٹر وے پولیس کا کہنا ہے کہ لاہور سیالکوٹ موٹروے بھی دھند کی وجہ سے ٹریفک کیلئے بند کر دی گئی ہے، پشاور سے رشکئی موٹروے بھی بند ہے، اس طرح کے موقسمی صورتحال میں مسافر غیر ضروری سفر سے گریز کریں، دوران ڈرائیونگ اگلی گاڑی سے مناسب فاصلہ رکھیں اور فوگ لائٹ کا استعمال یقینی بنائیں۔
محکمہ موسمیات کا کہنا ہے کہ ملک کے زیادہ تر علاقوں میں موسم سرد اور مطلع جزوی ابر آلود رہنے کا امکان ہے، پنجاب اور خیبر پختونخوا کے میدانی علاقوں میں دھند رہنے کی پیشگوئی کی گئی ہے جب کہ بالائی سندھ میں رات کو دھند چھائے رہنے کا امکان ہے، اسلام آباد میں موسم سرد اور مطلع جزوی ابرآلود رہنے کی توقع ہے، مری اور گلیات میں مطلع جزوی ابرآلود رہنے کی پیشگوئی ہے۔
معلوم ہوا ہے کہ بہا ولپور، ساہیوال، اوکاڑہ،لاہور،سیالکوٹ، نارووال،گوجرانوالہ،فیصل آباد، سرگودھا،ٹوبہ ٹیک سنگھ، خانیوال میں دھند رہنے کا امکان ہے، ملتان، خان پور، رحیم یار خان، حافظ آباد، بھکر،لیہ،ڈیرہ غا زی خان کے مختلف علاقوں، جیکب آباد، موہنجوداڑو، سکھر، لاڑکانہ، دادو، گھوٹکی، پڈعیدن، مردان، صوابی، چارسدہ نوشہرہ، پشاور اور ڈیرہ اسماعیل خان میں بھی دھند چھائی رہے گی۔
