Missile and drone attack on Riyadh failed, Saudi air defense averted major threat
اردو انٹرنیشنل (مانیٹرنگ ڈیسک) سعودی جریدے سعودی گزٹ خبر کے مطابق سعودی عرب کے فضائی دفاعی نظام نے جمعہ کے روز دارالحکومت ریاض اور مشرقی صوبے پر کیے گئے میزائل اور ڈرون حملوں کو بروقت کارروائی کے ذریعے ناکام بنا دیا، جس سے ممکنہ بڑے جانی و مالی نقصان سے بچاؤ ممکن ہوا۔
سعودی وزارتِ دفاع کے ترجمان ترکی المالکی کے مطابق مجموعی طور پر 6 بیلسٹک میزائل اور 26 ڈرونز کو نشانہ بنایا گیا۔ انہوں نے بتایا کہ تمام ڈرونز کو فضا میں ہی تباہ کر دیا گیا، جن میں سے 13 ریاض جبکہ 13 مشرقی صوبے میں مار گرائے گئے۔
ترجمان کے مطابق ریاض کی طرف داغے گئے 6 بیلسٹک میزائلوں میں سے 2 کو فضائی دفاعی نظام نے فضا میں ہی تباہ کر دیا، جبکہ باقی 4 خلیج عرب اور غیر آباد علاقوں میں گرے، جس کے باعث کسی قسم کے جانی نقصان کی اطلاع موصول نہیں ہوئی۔
انہوں نے مزید بتایا کہ انٹرسیپشن کے دوران گرنے والا ملبہ ریاض میں ایک فوجی مقام کے قریب گرا، تاہم کوئی بڑا نقصان رپورٹ نہیں ہوا۔ حکام کے مطابق تمام متعلقہ ادارے صورتحال پر گہری نظر رکھے ہوئے ہیں اور کسی بھی ہنگامی صورتحال سے نمٹنے کے لیے مکمل طور پر تیار ہیں۔
ایک روز قبل بھی سعودی فضائی دفاع نے مشرقی صوبے میں 38 ڈرونز کو تباہ کیا تھا، جو اس بات کی نشاندہی کرتا ہے کہ حملوں کا سلسلہ جاری ہے اور سکیورٹی خدشات برقرار ہیں۔
