پولیس لائنز اور کیڈٹ کالج پر حملے کی سازش ناکام، پشین میں فورسز کی بروقت کارروائی ، خودکش حملہ آور سمیت پانچ دہشت گرد مارے گئے

اردو انٹرنیشنل (مانیٹرنگ ڈیسک ڈان نیوز  کی خبر کے مطابق بلوچستان کے ضلع پشین میں محکمہ انسدادِ دہشت گردی نے انٹیلی جنس بنیاد پر ایک اہم کارروائی کرتے ہوئے مبینہ خودکش حملہ آور سمیت پانچ دہشت گردوں کو ہلاک کر دیا۔ محکمہ کے ترجمان کے مطابق یہ آپریشن پیر کے روز پرانے سرخاب مہاجر کیمپ کے قریب کیا گیا جہاں شدت پسندوں کی موجودگی کی اطلاع موصول ہوئی تھی۔

ترجمان کے بیان کے مطابق قانون نافذ کرنے والے اہلکاروں نے جیسے ہی مشتبہ ٹھکانے کو گھیرے میں لیا تو دہشت گردوں کی جانب سے شدید فائرنگ کی گئی، جس کے جواب میں فورسز نے مؤثر کارروائی کی۔ فائرنگ کے تبادلے کے نتیجے میں ایک مشتبہ خودکش حملہ آور اور اس کے چار ساتھی مارے گئے۔ حکام کا کہنا ہے کہ ہلاک دہشت گرد پولیس لائنز اور کیڈٹ کالج پشین پر حملے کی منصوبہ بندی کر رہے تھے، تاہم بروقت کارروائی سے یہ منصوبہ ناکام بنا دیا گیا۔

واقعے کے بعد علاقے کو گھیرے میں لے کر شواہد اکٹھے کیے گئے جبکہ جائے وقوعہ سے اسلحہ اور دیگر سامان برآمد ہونے کی اطلاعات بھی سامنے آئی ہیں۔ سیکیورٹی اداروں نے مزید تحقیقات کا آغاز کر دیا ہے تاکہ نیٹ ورک کے ممکنہ سہولت کاروں اور روابط کا سراغ لگایا جا سکے۔

محکمہ انسدادِ دہشت گردی نے کوئٹہ اور بارکھان میں الگ الگ کارروائیوں کے دوران چودہ مشتبہ شدت پسندوں کو ہلاک کرنے کا دعویٰ کیا ۔ سرکاری اعلامیے کے مطابق کوئٹہ کے علاقے درخشاں میں آٹھ مسلح افراد مارے گئے جبکہ بارکھان میں ایک اور انٹیلی جنس بنیاد پر کارروائی کے دوران چھ دہشت گرد انجام کو پہنچے۔

پاک فوج کے شعبۂ تعلقاتِ عامہ کے مطابق پانچ فروری کو بلوچستان میں ردالفساد-1 آپریشن مکمل کیا گیا جس میں کئی روز تک جاری کلیئرنس کارروائیوں کے دوران مجموعی طور پر 216 دہشت گرد ہلاک کیے گئے۔ حکام کے مطابق اکتیس جنوری کو صوبے میں ہونے والے حملوں کے بعد سیکیورٹی فورسز نے وسیع پیمانے پر آپریشن شروع کیا تھا، جس کے دوران تقریباً 180 مشتبہ افراد کو گرفتار اور بھاری مقدار میں اسلحہ برآمد کیا گیا۔

سیکیورٹی ذرائع کا کہنا ہے کہ صوبے میں امن و امان کی بحالی کے لیے کارروائیاں تسلسل کے ساتھ جاری رہیں گی اور حساس تنصیبات کے تحفظ کو ہر صورت یقینی بنایا جائے گا۔