وزیراعظم کا دورۂ چین، سی پیک اور سرمایہ کاری پر اہم بات چیت متوقع

اردو انٹرنیشنل (مانیٹرنگ ڈیسک) ڈان نیوز کی رپورٹ کے مطابق وزیراعظم شہباز شریف چار روزہ سرکاری دورے پر چین روانہ ہوگئے ہیں، جہاں وہ چینی قیادت سے اعلیٰ سطحی ملاقاتیں کریں گے اور دوطرفہ تعلقات، سی پیک، تجارت اور سرمایہ کاری سمیت مختلف شعبوں میں تعاون کے فروغ پر بات چیت ہوگی۔

وزیراعظم آفس کے مطابق نائب وزیراعظم و وزیر خارجہ اسحاق ڈار، وزیر منصوبہ بندی احسن اقبال، وزیر اطلاعات عطا اللہ تارڑ، وزیر آئی ٹی شزہ فاطمہ اور وزیراعظم کے مشیر طارق فاطمی بھی اس دورے میں وزیراعظم کے ہمراہ ہیں۔

دفتر خارجہ کے مطابق یہ دورہ 23 سے 26 مئی تک جاری رہے گا اور پاکستان اور چین کے سفارتی تعلقات کے قیام کی 75ویں سالگرہ کے موقع پر خصوصی اہمیت رکھتا ہے۔

دورے کے دوران وزیراعظم شہباز شریف چینی صدر شی جن پنگ اور وزیراعظم لی چیانگ سمیت اعلیٰ چینی قیادت سے ملاقاتیں کریں گے۔

دفتر خارجہ کے مطابق دونوں ممالک سیاسی، اقتصادی اور اسٹریٹجک تعاون کا جائزہ لیں گے، جبکہ سی پیک کے تحت جاری منصوبوں، تجارت، سرمایہ کاری، صنعتی تعاون، زرعی جدیدکاری، آئی ٹی، سائنس و ٹیکنالوجی اور عوامی روابط پر تفصیلی بات چیت ہوگی۔

وزیراعظم اپنے دورے کا آغاز ہانگژو سے کریں گے جہاں وہ پاکستان چین بزنس ٹو بزنس انویسٹمنٹ کانفرنس کی صدارت بھی کریں گے۔

بیجنگ میں وہ پاکستان اور چین کے سفارتی تعلقات کے 75 سال مکمل ہونے پر منعقدہ خصوصی تقریب میں بھی شرکت کریں گے، جو چینی پیپلز ایسوسی ایشن فار فرینڈشپ ود فارن کنٹریز کی جانب سے منعقد کی جا رہی ہے۔

دفتر خارجہ کے مطابق یہ دورہ دونوں ممالک کے درمیان سیاسی اعتماد کو مزید مضبوط کرے گا اور مختلف شعبوں میں عملی تعاون کو فروغ دے گا۔

ترجمان دفتر خارجہ نے کہا ہے کہ وزیراعظم کے دورے میں مشرق وسطیٰ کی صورتحال اور ایران امریکا کشیدگی بھی زیر بحث آئے گی، جبکہ پاکستان اور چین اس حوالے سے قریبی رابطے میں ہیں۔