Aston Villa beat Everton to spoil Moyes' return Photo-Reuters
اردو انٹرنیشنل (اسپورٹس ویب ڈیسک) تفصیلات کے مطابق پریمیئر لیگ کے ایک میچ میں ایورٹن کو اپنے نئے منیجر ڈیوڈ موئیس کی قیادت میں پہلے ہی میچ میں آسٹن ولا کے ہاتھوں 1-0 کی شکست کا سامنا کرنا پڑا۔ ایورٹن، جو اس میچ میں نئی امیدوں کے ساتھ میدان میں اتری تھی، اپنی ہی غلطیوں کے باعث مشکلات کا شکار ہوئی۔
دوسرے ہاف کے 51ویں منٹ میں ایورٹن کے کھلاڑی جارڈ برانتھویٹ کے غلط پاس کو مورگن راجرز نے اٹھایا اوراولی واٹکنز کو پاس دیا، جنہوں نے گول کیپر جارڈن پکفورڈ کے دفاع کو ناکام بناتے ہوئے فیصلہ کن گول کیا۔
واٹکنز جنہوں نے پہلے ایک موقع ضائع کیا تھا لیکن دوسری بار انہوں نے شاندار گول کر کے ولا کو برتری دلائی۔ ایورٹن کے پاس بھی کئی مواقع آئے جیسا کہ فارورڈ ڈومینک کالورٹ لیون کے پاس گول کرنے کا بہترین موقع تھا، لیکن وہ اپنی کمزور ڈرائیو کی وجہ سے ہدف حاصل نہ کر سکے۔
کالورٹ لیون کو یوری ٹائلی مینز کے ذریعے باکس میں گرایا گیا، لیکن ریفری نے پنالٹی نہیں دی، جس سے ایورٹن کو گول کرنے کا ایک اہم موقع ضائع ہو گیا اور پھر ایورٹن کے ایک اور حملے کو بوبکر کمارا نے گول لائن پر کلیئر کر دیا۔
اسی طرح ولانے بھی کئی مواقع ضائع کیے جیساکہ پہلے ہاف کے اختتام پر جیکب رمسی نے گول کرنے کا موقع گنوا دیا جب گیند ان کے قریب گری، لیکن ان کا شاٹ گول کے باہر چلا گیا۔
شکست کے بعد، ایورٹن اب بھی ریلیگیشن زون کے قریب ہے اور ٹیم کو مزید محنت کی ضرورت ہے۔ موئیس نے شکست پر افسوس کا اظہار کرتے ہوئے ٹیم کی کارکردگی بہتر بنانے کا عزم کیا اور مداحوں سے صبر کی درخواست کی۔
