پاکستان، ارجنٹائن میں فرینڈلی فٹبال میچ کا امکان

پاکستان فٹبال میں ایک اہم پیش رفت سامنے آئی ہے جہاں پاکستان فٹبال فیڈریشن (پی ایف ایف) اور ارجنٹائن فٹبال ایسوسی ایشن (اے ایف اے) کے درمیان باضابطہ رابطوں کا آغاز ہو گیا ہے۔

ذرائع کے مطابق دونوں فیڈریشنز کے حکام کے درمیان آن لائن اجلاس میں باہمی تعاون کے مختلف پہلوؤں پر تبادلہ خیال کیا گیا، جس میں خاص طور پر دونوں ممالک کی قومی ٹیموں کے درمیان ایک ممکنہ انٹرنیشنل فرینڈلی میچ زیرِ غور آیا۔

یہ میچ فیفا ورلڈ کپ کے بعد رواں سال منعقد کیے جانے کا امکان ظاہر کیا جا رہا ہے، تاہم حتمی فیصلہ مزید مشاورت کے بعد کیا جائے گا۔

اجلاس میں اس کے علاوہ فٹبال کے فروغ کے لیے مشترکہ ڈویلپمنٹ پروگرامز پر بھی بات چیت ہوئی، جس کے تحت ارجنٹائن کے کوچز پاکستان آ کر مقامی کھلاڑیوں اور کوچز کو تربیت فراہم کر سکتے ہیں۔

دونوں فیڈریشنز نے اس سلسلے میں مزید پیش رفت پر اتفاق کیا ہے، اور اگر معاملات طے پا گئے تو یہ مجوزہ فرینڈلی میچ پاکستان فٹبال کے لیے ایک اہم سنگ میل ثابت ہو سکتا ہے۔