بین الاقوامی کراٹے چیمپئن شاہزیب رند کا وطن واپسی پر شاندار استقبال

اردو انٹرنیشنل اسپورٹس ویب ڈیسک تفصیلات کے مطابق بلوچستان سے تعلق رکھنے والے شاہزیب رند، سنگاپور میں منعقدہ ورلڈ کراٹے کامبیٹ مقابلہ جیتنے کے بعد اپنے آبائی وطن واپس پہنچ گئے۔

شاہزیب نے کراٹے کمبیٹ کے عالمی مقابلے میں برازیل کے معروف کراٹے فائٹر برونو اسیس کو فیصلہ کن مقابلے میں شکست دی اور اپنے ملک کا نام روشن کیا۔

شاہزیب رند کا کوئٹہ ایئرپورٹ پر شاندار استقبال کیا گیا، جہاں بلوچستان کے وزیر اعلیٰ میر سرفراز بگٹی نے انہیں گلے لگا کر ان کی عظیم کامیابی پر مبارکباد دی۔ وزیر اعلیٰ بگٹی نے شاہزیب کی جیت کو نہ صرف بلوچستان بلکہ پورے پاکستان کے لیے فخر کا لمحہ قرار دیا۔

شاہزیب رند کی برازیل کے برونو اسیس کے خلاف فائٹ کو ایک سخت اور سنسنی خیز مقابلہ قرار دیا جا رہا تھا۔ اسیس، جو کہ اپنے جارحانہ اور تجربہ کار انداز کی وجہ سے مشہور ہیں، نے مقابلے کے ابتدائی راؤنڈز میں کافی مزاحمت دکھائی۔ تاہم، شاہزیب نے اپنی بہترین تکنیک، رفتار اور عزم کا مظاہرہ کرتے ہوئے مقابلے کو اپنے حق میں پلٹ دیا۔ تیسرے راؤنڈ میں شاہزیب نے ایک زبردست وار کے ذریعے برونو کو نیچے گرایا، جس کے بعد ریفری نے مقابلے کا اختتام شاہزیب کی فتح پر کیا۔

اس موقع پر وزیر اعلیٰ سرفراز بگٹی نے کہا، “شاہزیب رند کو مسلسل کامیابیاں حاصل کرنے پر مبارکباد ہے! آپ نے بلوچستان اور پاکستان دونوں کا سر فخر سے بلند کیا ہے۔” انہوں نے خاص طور پر بلوچستان کے نوجوانوں کے لیے شاہزیب کی کامیابی کو ایک مثال قرار دیتے ہوئے کہا کہ اس طرح کے کارنامے نوجوانوں کو آگے بڑھنے اور ملک کی نمائندگی کرنے کی ترغیب دیتے ہیں۔

انہوں نے مزید کہا، “آپ نے نہ صرف پاکستان بلکہ عالمی سطح پر ملک کا نام روشن کیا ہے، ملک کا روشن مستقبل آپ جیسے باصلاحیت نوجوانوں کے ہاتھ میں ہے۔ آپ کی کامیابیاں بلوچستان کے نوجوانوں کے لیے امید اور ترقی کا پیغام ہیں۔”

شاہزیب رند کی اس کامیابی کو سوشل میڈیا پر بھی بھرپور پذیرائی ملی، جہاں لوگوں نے انہیں قومی ہیرو قرار دیا اور ان کے مستقبل کے لیے نیک تمناؤں کا اظہار کیا۔ شاہزیب کی یہ کامیابی اس بات کا ثبوت ہے کہ پاکستان کے نوجوان، عالمی سطح پر کسی سے کم نہیں، اگر انہیں درست مواقع اور رہنمائی فراہم کی جائے۔