Former Nigerian footballer Michael Eniramo dies during a match-Getty Images
نائیجیریا کے سابق فٹبالر مائیکل اینیرامو دوستانہ میچ کے دوران دل کا دورہ پڑنے سے انتقال کر گئے۔
برطانوی میڈیا کے مطابق 40 سالہ اینیرامو جمعہ کی صبح کادونا کے علاقے اُنگوان یلوا میں ایک مقامی میچ کھیل رہے تھے کہ دوسرے ہاف کے آغاز کے چند منٹ بعد اچانک میدان میں گر پڑے۔
نائیجیریا فٹبال فیڈریشن نے واقعے کی تصدیق کرتے ہوئے بتایا کہ ابتدائی اطلاعات کے مطابق ان کی موت دل کا دورہ پڑنے کے باعث ہوئی۔
فیڈریشن کے جنرل سیکریٹری محمد سنوسی نے اپنے تعزیتی بیان میں اس سانحے کو دل دہلا دینے والا قرار دیتے ہوئے مرحوم کے لیے مغفرت اور اہل خانہ کے لیے صبر کی دعا کی۔
مائیکل اینیرامو نے اپنے کیریئر کے دوران افریقہ، یورپ اور مشرق وسطیٰ کے مختلف کلبوں کی نمائندگی کی، جبکہ وہ نائیجیریا کی قومی ٹیم کے لیے بھی 10 میچز کھیل چکے تھے۔
