سابق نگران وفاقی وزیر داخلہ سرفراز بگٹی کا پیپلز پارٹی میں شمولیت کا اعلان
تربت میں پاکستان پیپلزپارٹی کے ورکرز کنونشن سے خطاب کرتے ہوئے سابق نگران وفاقی وزیر داخلہ سرفراز بگٹی نے کہا کہ تربت کی سرزمین پر پیپلزپارٹی میں شمولیت اختیار کی ہے، اعزاز کی بات ہے کہ پیپلزپارٹی میں شمولیت اختیار کررہا ہوں.
سابق نگران وزیرداخلہ نے کہا کہ آصف زرداری کی قیادت میں خطے میں امن قائم ہوگا، پیپلزپارٹی نے 18 ویں ترمیم سے بلوچوں کو حقوق دیے، تربت سےقوم پرستی کی سیاست کے خاتمے کا آغاز کررہےہیں، ہمارا مقصد پاکستان کو محفوظ،پر امن، خوشحال بنانا ہے۔
تربت میں ورکرز کنونشن سے خطاب کرتے ہوئے پاکستان پیپلز پارٹی کے شریک چیئرمین آصف علی زرداری کا کہنا تھا کہ بلوچستان پاکستان کو ایک بڑا ملک بنا سکتاہے، بلوچستان کی زمین سےسونا نکل سکتا ہے، بلوچستان پاکستان کا دل ہے، میں بلوچستان کو پہلے سے دس گنا بہتر بناؤں گا، اب معاشی حالات بہتر کرنے ہیں۔
انہوں نے کہا ہے کہ ہم بلوچستان کے عوام کا غم سمجھتے ہیں، مار دھاڑ سےکوئی ملک ترقی نہیں کرسکتا، قومیں امن کی وجہ سے ترقی کرتی ہیں جنگ سے نہیں۔
ان کا کہنا تھا کہ اسلام آباد بلوچستان، سندھ، خیبر پختون خوا کو نہیں سمجھتا، اگر ہم اقتدار میں آئیں گے تو آپ کی خدمت کریں گے۔
