برازیل نے سوشل میڈیا پلیٹ فارم ’ایکس‘ پر پابندی عائد کردی
اردو انٹرنیشنل (مانیٹرنگ ڈیسک) برازیل کی سپریم کورٹ کے جج ایلگزینڈ موریس نے ایک تاریخی فیصلہ دیتے ہوئے نیشنل ٹیلی کمیونیکیشن کو حکم جاری کیا کہ فوری طور پر ملک بھر میں ایکس کی سروسز کو مکمل طور پر بند کردیا جائے۔ یہ فیصلہ اس وقت سامنے آیا ہے جب ایلون مسک اور برازیلی حکومت کے درمیان کشمکش شدت اختیار کر گئی ہے۔
جج ایلگزینڈ موریس نے گوگل اور ایپل سمیت تمام انٹرنیٹ سروس پرووائیڈرز کو ایکس ایپلی کیشنز کو روکنے کے لیے ٹیکنالوجیکل رکاوٹیں لگانے کا حکم بھی دیا ہے۔
غیر ملکی میڈیا کے مطابق برازیلی عدالت نے ایلون مسک سے فیک نیوز پھیلانے والوں کے خلاف کارروائی کا مطالبہ کیا تھا۔ تاہم ایلون مسک نے برازیل میں اس مقصد کے لیے دفتر کھولنے سے انکار کر دیا تھا۔
ایلون مسک نے اس فیصلے کو سخت الفاظ میں مسترد کرتے ہوئے کہا ہے کہ یہ فیصلہ آزادی اظہار پر ایک حملہ ہے۔ انہوں نے دعویٰ کیا ہے کہ سپریم کورٹ کے جج موریس نے کمپنی کے قانونی نمائندے کو سینسرشپ آرڈر پر جبری عمل درآمد کیلئے گرفتاری کی دھمکیاں دی تھیں۔
واضحرہے کہ برازیل میں ایکس کو 22 ملین سے زائد صارفین استعمال کرتے ہیں جو اسے ملک کا سب سے مقبول سوشل میڈیا پلیٹ فارم بناتا ہے۔
